Qazaqstandyq preparat súıek metastazdaryn emdeýde tıimdiligin kórsetti
ASTANA. KAZINFORM – Qazaqstanda otandyq ıadrolyq medıtsınanyń damýy onkologııalyq aýrýlarǵa shaldyqqan naýqastardy emdeýdiń jańa múmkindikterin ashyp otyr. QR Prezıdenti Іs basqarmasy Medıtsınalyq ortalyǵy aýrýhanasynyń ıAdrolyq medıtsına ortalyǵynda súıek metastazdaryn emdeýge arnalǵan «Samarıı-153 Sm Oksabıfor» radıofarmatsevtıkalyq dárilik preparaty qoldanylyp keledi.
Atalǵan ádis 2024 jyldyń sońynda engizilgen. Sodan beri bul emdi 50-den astam patsıent qabyldaǵan. Mamandardyń málimetinshe, terapııa súıek metastazdary bar naýqastardaǵy aýyrsyný sındromyn azaıtyp, súıek tinindegi isik oshaqtarynyń kólemin tómendetýge yqpal etedi.
«2024 jyldyń sońynda Ortalyqta súıek metastazdaryn 153Sm Samarıı Oksabıfor preparatynyń kómegimen radıonýklıdtik terapııa arqyly emdeý ádisi sátti engizildi. Búgingi tańda bul emdi 50-den astam patsıent qabyldady. Klınıkalyq baqylaý men zertteýler nátıjeleri aýyrsyný sındromynyń tómendep, súıek tinindegi metastaz oshaqtary kóleminiń azaıýy sııaqty oń ózgeristerdi kórsetti. Bul emdeý ádisiniń tıimdiligin, onyń qaterli isikke shaldyqqan naýqastardy emdeýdegi mańyzdy rólin jáne patsıentterdiń ómir sapasyn jaqsartýǵa qosatyn úlesin aıqyn dáleldeıdi», – dedi ıAdrolyq medıtsına ortalyǵynyń basshysy Aıgúl Sádýaqasova.
Mamandardyń aıtýynsha, terapııanyń negizgi maqsaty – naýqastyń aýyrsynýyn jeńildetip, kúndelikti belsendiligin saqtaýǵa múmkindik berý. Qazirgi tańda ádistiń tıimdiligi klınıkalyq tájirıbede de rastalyp otyr.
Terapııa nátıjesin patsıentterdiń ózderi de oń baǵalaýda.
«Qazir samarıı preparatymen emniń úshinshi kýrsynan ótip jatyrmyn. Alǵashqy kýrsqa kelgende tireýishpen, keıin taıaqpen júrdim, al úshinshi kýrsqa eshqandaı kómekshi quralsyz, óz aıaǵymmen keldim. Mende sút beziniń qaterli isigi jáne súıek pen omyrtqada metastazdar bar. Qazaqstanda osyndaı preparattyń qoljetimdi bolǵanyn estigende, keıin ókinbes úshin em qabyldaýǵa sheshim qabyldadym. Qazir qatty aýyrsynýlardyń basym bóligi joǵaldy», – deıdi ıAdrolyq medıtsına ortalyǵynyń patsıenti.
Dárigerlerdiń sózinshe, radıonýklıdtik terapııany isikke qarsy emdeýdiń basqa túrlerimen qatar qoldanýǵa bolady. Atap aıtqanda, ol hımıoterapııamen, targettik, gormondyq jáne ımmýndyq emdeý tásilderimen birge júrgiziledi.
Sonymen qatar bul ádis uzaq ońaltýdy qajet etpeıdi jáne aýyr janama áserlerdiń az bolýymen erekshelenedi.
Mamandar sońǵy bir jylda jınaqtalǵan tájirıbe radıonýklıdtik terapııanyń negizgi emdi tolyqtyryp qana qoımaı, patsıentterdiń ómir sapasyn jaqsartýǵa eleýli úles qosatynyn kórsetkenin atap ótti.
Aıta keteıik, dárilik zattardy utymdy basqarýdyń esebinen 3,5 mlrd teńge únemdeldi.
