Qazaqstandyq polıtseılerdiń jeke isinde qandaı málimetter saqtalady
ASTANA. KAZINFORM — Qazaqstanda ishki ister organdary qyzmetkerleriniń jeke isterin júrgizý qaǵıdalary jańartyldy. Tıisti ózgerister Іshki ister mınıstriniń 2026 jylǵy 20 tamyzdaǵy buıryǵymen engizildi.
Jańa qaǵıdalarǵa sáıkes, polıtsııa qyzmetkeriniń jeke isi bes bólimnen turady.
Birinshi bólimde qyzmettik tizim men qyzmet ótilin rastaıtyn qujattar saqtalady.
Ekinshi bólimge qyzmet ótkerýge qatysty qujattar engiziledi. Olardyń qatarynda testileý nátıjeleri, oqýdan ótkeni týraly sertıfıkattar, attestattaý paraqtary, qyzmettik minezdemeler, qyzmetke taǵaıyndaý, aýystyrý jáne qyzmetten bosatý týraly usynymdar, sondaı-aq marapattaý materıaldary bar.
Úshinshi bólimde qyzmetke qabyldaý kezinde jáne qyzmet ótkerý barysynda usynylatyn qujattar saqtalady. Olardyń ishinde ótinish, ómirbaıan, minezdemeler, áskerı-dárigerlik komıssııanyń qorytyndysy, túrli mindettemeler, qolhattar jáne Ant mátini bar.
Tórtinshi bólimniń qujattary «Arhıvtik materıaldar» degen jeke býmada saqtalady. Oǵan eńbek sharttary men kelisimsharttar, baıanattar, qyzmettik tekserý materıaldary, eskirgen qyzmettik tizimder men ómirbaıandar, densaýlyq jaǵdaıy týraly qujattar, qyzmetten bosatý týraly habarlamalar jáne ózektiligin joǵaltqan ózge de qujattar engiziledi.
Besinshi bólim «Zerdeleý jáne arnaıy tekserý materıaldary» dep atalady. Onda kandıdattar men qyzmetkerlerdi tekserýge qatysty materıaldar, onyń ishinde jaqyn týystary týraly málimetter, ulttyq qaýipsizdik organdarynyń jaýaptary, tekserý nátıjeleri, arnaıy tekserý qorytyndylary, memlekettik qupııalarǵa ruqsat berý týraly qujattar, sondaı-aq psıhologııalyq-áleýmettanýlyq zertteýlerdiń nátıjeleri saqtalady.
Qyzmettik tizimdi júrgizýge qoıylatyn talaptar da jańartyldy. Ondaǵy jazbalar kók tústi sııamen nemese sharıkti qalammen, qolmen, anyq, qysqartýlarsyz jáne túzetýlersiz jazylady.
Eger qyzmettik tizimdegi jazbalardan dálsizdik anyqtalsa, tıisti túzetýler engiziledi. Túzetýler «Túzetilgenge sený kerek» degen jazýmen rastalyp, kadr qyzmeti qyzmetkeriniń qoly qoıylady jáne kadr qyzmetiniń mórimen bekitiledi.
Qyzmettik tizimdegi jazbalardy memlekettik nemese orys tilinde toltyrýǵa bolady. Sandyq derekterdi kórsetý kezinde tek arab tsıfrlaryn qoldanýǵa ruqsat etiledi.
Jańa qaǵıdalar jekelegen erejelerdi qospaǵanda, 2027 jylǵy 1 qańtardan bastap kúshine enedi.
Buǵan deıin ІІM joǵary oqý oryndaryna qabyldaý tolyqtaı tsıfrlyq formatqa kóship, talapkerlerdiń qaǵaz túrindegi jeke isterin rásimdeý aıtarlyqtaı azaıǵanyn jazǵan edik.
