Qazaqstandyq polıtseıler halyqaralyq kıberqaýipsizdik jarysynda top jardy
ASTANA. KAZINFORM - 19-21 mamyr aralyǵynda Marokko Koroldiginiń Marrakesh qalasynda Eýropa Keńesi men Interpoldyń qoldaýymen Cyber Games jáne Digital Security Challenge 2026 halyqaralyq jarystary ótti, dep habarlaıdy Polisia.kz.
Іs-sharaǵa álemniń 58 memleketinen kelgen ókilder qatysyp, olar 16 halyqaralyq komanda quramyna biriktirildi. Týrnır kıberqylmysqa qarsy is-qımyl, tsıfrlyq krımınalıstıka, kıberqaqtyǵystarǵa den qoıý jáne aqparattyq qaýipsizdikti qamtamasyz etý máselelerine arnaldy.
-Tartysty ıntellektýaldyq saıys qorytyndysy boıynsha Qazaqstan Respýblıkasy Іshki ister mınıstrliginiń kıberqylmysqa qarsy is-qımyl departamentiniń úsh qyzmetkeri óner kórsetken komanda aıqyn basymdyqpen jeńiske jetti. Qatysýshylar kıberqaýipterdi anyqtaý jáne olardyń jolyn kesý salasyndaǵy kásibı daıyndyqtarynyń joǵary deńgeıin, analıtıkalyq qabiletteri men tájirıbelik daǵdylaryn kórsetti,-delingen habarlamada.
Qazaqstandyq mamandardyń bul jeńisi tsıfrlyq qaýipsizdik salasyndaǵy otandyq quqyq qorǵaý organdary jumysynyń tıimdiligin dáleldep, kıberqylmysqa qarsy kúrestegi Qazaqstannyń halyqaralyq bedelin nyǵaıtty.
– Qyzmetkerlerimizdiń bul jetistigi – jaı ǵana jarystaǵy jeńis emes, bul ulttyq kıberqaýipsizdik mektebiniń joǵary deńgeıi men qazaqstandyq mamandardyń álemdik arenadaǵy kásibıliginiń moıyndalýy, - dep atap ótti ІІM ókilderi.
Osyǵan deıin Qazaqstannyń kıberqaýipsizdik kórsetkishi jaqsarǵany týraly jazdyq.
