Qazaqstandyq pıanıst Londondaǵy bedeldi baıqaýda birinshi oryndy ıelendi

ASTANA. KAZINFORM -  Jambyl atyndaǵy Qazaq memlekettik akademııalyq fılarmonııasynyń solısi (pıanıst) Janar Súleımanova Ulybrıtanııanyń London qalasynda ótken «World talent award» halyqaralyq baıqaýynda birinshi oryndy ıelendi.

Sheberlik pen kásibıliktiń joǵary deńgeıin kórsetken ol 71 memleketten qatysqan ónerpazdardyń arasynan úzdik shyqty, dep habarlaıdy QR Mádenıet jáne sport mınıstrliginiń baspasóz qyzmeti.

Janar Súleımanova — AQSh, Italııa jáne Frantsııadaǵy halyqaralyq baıqaýlardyń laýreaty. Kontserttik qyzmeti jyldarynda júzdegen kontsertter berdi. Olardyń ishinde ár túrli baǵdarlamalary men repertýarlarymen 130-dan astam klavırabendter bar. Pıanıst halyqaralyq arenada, atap aıtqanda, Reseıde, Italııada, Germanııada, AQSh-ta jáne basqa da kóptegen elderde gastroldik saparlarǵa shyǵyp, Qazaqstandy álemge tanystyryp júr.

«GOLDEN TIME TALENT» – shyǵarmashylyq toptar men jeke oryndaýshylarǵa arnalǵan halyqaralyq baıqaýlar men festıvalderdi uıymdastyrýda álemdik kóshbasshy joba. Álemniń túkpir-túkpirinen sýretshiler, mýzykanttar, vokalıster, bıshiler syndy ónerpazdardy jınap, baq synasatyn óner saıysy bıyl tórtinshi ret ótkizilip otyr.