Qazaqstandyq pedagogterdi atestattaý júıesi jetildirilip jatyr
Memleket basshysynyń tapsyrmasy boıynsha pedagogterdi attestattaý júıesin jetildirý jumysy bastaldy. Atap aıtqanda, Ulttyq platforma bazasynda pedagog qyzmetiniń nátıjelerin qalyptastyrý protsesi avtomattandyrylýda. Bul týraly QR Oqý-aǵartý mınıstrliginde ótken apparat otyrysynda aıtyldy, dep jazdy Kazinform.
Attestattaý tártibine ózgerister engizý maqsatynda osy jyldyń mamyr aıynda jumys toby qurylyp, onyń quramyna bilim berýdiń ár deńgeıi boıynsha pedagogter men sarapshylar kirdi. Bilim berýdiń barlyq deńgeıleri men pedagogıkalyq laýazymdardyń erekshelikterin anyqtaý boıynsha jumystar júrgizildi. Nátıjesinde ár bilim deńgeıi boıynsha jeke laýazym sanaty úshin baǵalaý krıterııleri men tıimdilik kórsetkishteri ázirlendi. Ár biliktilik sanaty úshin belgilengen krıterııler saralandy. Budan basqa, sabaqty baqylaýdyń avtomattandyrylǵan túri ázirlendi, ol naqty sabaq mysalynda synaqtan ótkizildi.
«Atestattalatyn pedagog platformadaǵy óziniń jeke kabıneti arqyly attestatsııadan ótýge ótinimdi óz betinshe bere alady, munda ıntegratsııalyq ádis qoldanyla otyryp, muǵalimniń jeke derekteri, bilim alýshylardyń oqý úlgerimi men bilim sapasy, olımpıadalar men jobalardaǵy nátıjeleri, biliktilikti arttyrý kýrstary, PBB nátıjeleri jáne t.b. aqparattar jınaqtalǵan. Sondaı-aq, pedagogıka men oqytý ádistemesi boıynsha testileý alynyp tastaldy. Pedagogtiń kásibı sheberligi tek oqytylatyn páni boıynsha jáne ol óz sanatyn moderator men sarapshy dárejesine kóterýge ótinish bergende ǵana baǵalanatyn bolady. Josparlanǵan jańa ózgeristerge sáıkes, pedagogtiń joǵary kásibı deńgeıi men tabysty qyzmeti oqýshylarynyń jetistikterine tikeleı baılanysty bolmaq», - dedi orta bilim berý komıtetiniń tóraǵasy Qanybek Jumashev.
Aıta keteıik, pedagogterdi attestatsııalaýdyń jańartylǵan júıesi 2024 jyldyń qańtar aıynan bastap elimizdiń tórt oblysynda: Soltústik Qazaqstan, Shyǵys Qazaqstan, Batys Qazaqstan jáne Túrkistan oblystarynda pılottyq rejımde iske qosylady. Jobany tolyq iske asyrý 2024 jyldyń kókteminde bastalady dep josparlanýda.
Apparat keńesiniń sońynda mınıstr Ǵanı Beısembaev túsindirý jumystaryn kúsheıtý boıynsha birqatar tapsyrmalar berip, elimizdiń árbir óńirinde aqparattyq jumystardy keńinen qamtamasyz etýdiń mańyzdylyǵyn atap ótti.