Qazaqstandyq paravoleıbolshylar álem kýbogynda kezekti jeńisine qol jetkizdi

ASTANA. KAZINFORM – AQSh-tyń Fort-Ýeın qalasynda voleıboldy otyryp oınaýdan álem kýbogy ótip jatyr.

Dúnıejúzilik dodaǵa 14 erler jáne 6 áıelder quramasy qatysyp, baq synap jatyr.

Bıyl óz tarıhynda alǵash ret Azııa chempıony atanǵan Qazaqstan erler quramasy oıyndaryn sátti ótkizip keledi.

Baýyrjan Tahaýovtyń shákirtteri aldymen Italııa quramasyn 3:0 esebimen tize búktirdi. Sodan keıin Polsha men Kanadadan dál sondaı eseppen aılasyn asyrdy.

Búgin qazaqstandyq paravoleıbolshylar Frantsııa quramasyn 3:0 (25:21, 25:10, 25:14) esebimen utty. Erteń qazaqstandyqtar alań ıeleri AQSh-pen oınaıdy.

Ulttyq quramanyń bas bapkeri B.Tahaýov shákirtteriniń kóńil-kúıi jaqsy ekendigin, joǵary mejeden kóriný úshin baryn salatynyn jetkizdi.

Bul týrnırdiń ereksheligi sol, 2028 jyly Los-Andjeleste ótetin Paralımpıada oıyndaryna qatysý úshin reıtıngilik upaılar beriledi. Ótken jyly Qazaqstan quramasynyń Parıj Paralımpıadasynda besinshi orynǵa taban tiregeni belgili.

Eske sala keteıik, budan buryn qazaqstandyq paravoleıbolshylardyń alǵash ret Azııa chempıony atanǵanyn jazǵan edik.