Qazaqstandyq otbasylar iship-jem bıýdjetiniń 33 paıyzyn etke jumsaıdy
ASTANA. KAZINFORM — Finprom.kz saraptama resýrsy qazaqstandyqtardyń 2024 jyldyń alǵashqy úsh aıynda azyq-túlik pen alkogolsiz sýsynǵa jumsaǵan shyǵynyn eseptep, bir jyldyń ishinde bul kórsetkish 21,1 paıyz óskenin jazdy.
«Bıylǵy birinshi toqsanda árbir ortasha statıstıkalyq turǵyn azyq-túlik pen alkogolsiz sýsynǵa 131,3 myń teńge jumsaǵan. Bul bir jylǵy kórsetkishten 6,7% artyq. Salystyryp aıtsaq, byltyrǵy birinshi toqsanda bul shyǵynnyń jan basyna shaqqandaǵy kólemi 123,1 myń teńge bolǵan. Al jyldyq ósim 21,1%-ge jetip otyr. Bes jyl burynǵy kezeńdi qarasaq, 2019 jyldyń birinshi toqsanynda qazaqstandyqtar iship-jemge 72,3 myń teńge jumsaǵan. ıAǵnı qazirgiden 44,9% az», — dep jazylǵan saraptamada.
Óńirler boıynsha alsaq, iship-jemge eń kóp aqsha shyǵyndaıtyndar Almaty qalasynda (181,5 myń teńge), Shyǵys Qazaqstan (152,1 myń teńge) jáne Mańǵystaý (146,7 myń teńge) oblystarynda turady.
Azyq-túlik pen alkogolsiz sýsynǵa eń az aqsha jumsaıtyn óńirlerdiń úshtigine Qyzylorda (104,6 myń teńge), Aqtóbe (106,4 myń teńge) jáne Túrkistan (110,4 myń teńge) oblystary kirgen.
«Qazaqstandyqtardyń azyq-túlik pen alkogolsiz sýsyndarǵa jumsaıtyn aqshalarynyń úshten bir bóligi et pen et ónimderine ketedi — 43,3 myń teńge. Bul bir jyl burynǵy kórsetkishten 6,4% kóp. Odan keıin kóp aqsha shyǵyndaıtyn ónimder — nan jáne jarna ónimderi (kisi basyna 20,5 myń teńge), sút ónimderi (14,5 myń teńge), jemis-jıdek (11,6 myń teńge) jáne kókónis (8,9 myń teńge). Árbir qazaqstandyq úsh aıda qant pen kondıter ónimderine, táttilerge orta eseppen 8,7 myń teńge, maı ónimderine 6,7 myń teńge, balyq pen teńiz ónimderine 5,9 myń teńge, alkogolsiz sýsyndarǵa 5,8 myń teńge, jumyrtqaǵa 3,3 myń teńge jumsaǵan», — dep jazady Finprom.kz.
