Qazaqstandyq otbasylar qandaı memlekettik qoldaýdy kóbirek qajet etedi
ASTANA. KAZINFORM – Qazaqstandyqtardyń 60,9%-y otbasylardy qoldaýda turǵyn úı alýǵa kómektesýdi eń mańyzdy baǵyttardyń biri dep sanaıdy, dep habarlaıdy Qazaqstandyq qoǵamdyq damý ınstıtýty.
QQDI júrgizgen áleýmettanýlyq zertteýge 3 myń respondent qatysqan. Saýalnama barysynda azamattar otbasylar úshin memlekettik qoldaýdyń qandaı baǵyttary asa mańyzdy ekenin jáne qoldanystaǵy qoldaý sharalary týraly qanshalyqty habardar ekenin aıtqan.
Zertteý nátıjesinde turǵyn úı alýǵa kómek kórsetýge suranys eń joǵary ekeni anyqtaldy. Bul baǵytty respondentterdiń 60,9%-y tańdaǵan.
Ekinshi orynda jumysqa ornalasýǵa járdemdesý tur. Mundaı qoldaýdy saýalnamaǵa qatysqandardyń 52,8%-y mańyzdy dep esepteıdi.
Sapaly medıtsınalyq qyzmetterdiń qoljetimdi bolýyn respondentterdiń 29,8%-y, balalardy sapaly bilimmen qamtamasyz etýdi 28,4%-y ataǵan.
Al turmystyq zorlyq-zombylyqtyń aldyn alý jáne oǵan qarsy is-qımyl máseleleri boıynsha kómek kórsetýdi saýalnamaǵa qatysýshylardyń 17,9%-y mańyzdy dep kórsetken.
– Otbasynyń ál-aýqaty men turaqtylyǵy – qoǵamnyń áleýmettik damýynyń mańyzdy kórsetkishteriniń biri. Osyǵan baılanysty otbasylardyń qandaı qoldaý sharalaryn asa qajet dep sanaıtynyn jáne memlekettik qoldaý tetikteri týraly qanshalyqty habardar ekenin bilý mańyzdy, – delingen QQDI aqparatynda.
Zertteýde qazaqstandyqtardyń otbasyn qoldaýǵa baǵyttalǵan memlekettik sharalar týraly habardarlyǵy da qarastyrylǵan. Azamattar bala týǵan kezde beriletin birjolǵy járdemaqy, júktilik pen bosanýǵa baılanysty áleýmettik tólem, bala bir jarym jasqa tolǵanǵa deıin onyń kútimine baılanysty áleýmettik tólem, kópbalaly analarǵa beriletin aı saıynǵy memlekettik járdemaqy týraly jetkilikti deńgeıde habardar.
Sondaı-aq respondentter júktilik pen bosanýǵa baılanysty demalys jáne bala úsh jasqa tolǵanǵa deıin onyń kútimine baılanysty jalaqy saqtalmaıtyn demalys týraly da biletinin kórsetken.
Saýalnamada respondentter birneshe jaýap nusqasyn tańdaı alǵandyqtan, jaýaptardyń jalpy jıyntyǵy 100%-ǵa teń emes.
7-13 qyrkúıek aralyǵynda Qazaqstanda Otbasy aptalyǵy ótip jatyr. Ol Otbasy kúnine oraılastyrylyp, otbasylyq qundylyqtardy nyǵaıtýǵa, jaýapty ata-ana bolýdy nasıhattaýǵa, urpaqtar sabaqtastyǵyn saqtaýǵa jáne otbasylyq ál-aýqatty arttyrýǵa baǵyttalǵan.
Aıta keteıik, Otbasy bank 3000-nan astam jetim balaǵa baspana bóldi.
