Qazaqstandyq órt sóndirýshiniń shapshańdyǵy álemdi tańǵaldyrdy
ASTANA. KAZINFORM — Saýd Arabııasynyń Er-Rııad qalasynda órt sóndirý-qutqarý sportynan ótken álem chempıonatynda Qazaqstan quramasy joǵary nátıje kórsetti. Jarysta Nazarbek Ánýarbekovtiń jyldamdyǵy men shapshańdyǵy áleýmettik jelide tarap, kópshiliktiń qyzyǵýshylyǵyn týdyrdy. Osy oraıda Nazarbek Ánýarbekov Jibek Joly telearnasynyń «Búgin LIVE» baǵdarlamasynda suhbat berdi.
— Áleýmettik jelide vıdeo tarap ketedi dep kútken joqpyn. Bizdegi maqsat — halyqaralyq arenda óz múmkindigimizdi barynsha kórsetý. Birinshi kúni oqý munarasynda kóterilý, ekinshi kúni 100 metrlik kedergilerden ótý, úshinshi kúni tórt adamdyq estafeta, tórtinshi kúni órt sóndirý-qutqarý qyzmetin uıymdastyryp, shynaıy jaǵdaıda áreket etý kezeńi boldy. Bul kezeńderdiń bárinde komanda bapkeriniń qoldaýy erekshe kúsh berdi. Sonyń arqasynda Qazaqstan quramasy jalpy komandalyq esepte 4-orynǵa taban tirep, eki qola medal ıelendi, — dedi Nazarbek Ánýarbekov.
Ol sondaı-aq órt sóndirý-qutqarý sportynda ár sekýnd, ár qımyl esepteletinin, jyldam sheshim qabyldaý úshin tek fızıkalyq emes, psıhologııalyq daıyndyq ta mańyzdy ekenin atap ótti.
Aıta keteıik, álemdik dodada 20 elden kelgen 14 er jáne 6 áıelder komandasy baq synady. Qazaqstan Tótenshe jaǵdaılar mınıstrliginiń ulttyq quramasy barlyq saıys túrinde óner kórsetti. Chempıonattyń qorytyndysy boıynsha erler quramasy jalpykomandalyq esepte 4-orynǵa ıe bolyp, eki qola medal jeńip aldy. Al áıelder komandasy úsh qola júldemen ǵana emes, jańa ulttyq rekord ornatyp, kórermenderdi qýantty.
Buǵan deıin Qazaqstan quramasy órt sóndirý-qutqarý sportynan álem chempıonatynda qola júlde ıelengenin jazǵanbyz.