Qazaqstandyq ónimniń eksporttyq áleýeti ekologııalyq tehnologııaǵa ınvestıtsııa salýyna baılanysty - Dılafrýz Madıeva
ASTANA. KAZINFORM – Búginde shetel naryǵyna shyǵý otandyq óndirýshilerden óndiristi aýqymdy tehnologııalyq jańǵyrtýdy talap etedi.
«Balmuzdaq» JShS-niń bas dırektory Dılafrýz Madıevanyń aıtýynsha, kásiporynnyń Qytaı naryǵyna eksporttyq serpilis jasaýyna balamaly energetıka men óndiristi avtomattandyrýǵa basymdyq berý yqpal etken.
Jýyrda ótken Qytaı taýarlarynyń XXI halyqaralyq kórmesi bul áleýetti taǵy bir márte dáleldedi. Kompanııanyń balmuzdaq, jartylaı fabrıkattar jáne shokolad ónimderi myńdaǵan kelýshiniń qyzyǵýshylyǵyn týdyryp, ásirese shokolad degýstatsııadaǵy eń tanymal ónimge aınaldy.
«Bul Qazaqstanda óndirilgen ónimdi halyqaralyq naryqta ilgeriletý jolyndaǵy biz úshin úlken qadam. Eńbegimizdiń elimizde de joǵary baǵalanǵany erekshe qýantady. Kórme qorytyndysy boıynsha Túrkistan oblysynyń ákimdigi óńirdiń abyroıyn laıyqty tanystyrǵanymyz úshin bizge alǵys marapatyn tabystady», – deıdi kompanııa basshysy.
Qazirgi tańda kásiporynnyń halal ónimderi Reseı, Ózbekstan jáne Tájikstan elderine turaqty eksporttalady. Al Qytaıǵa alǵashqy jetkizilim kólemi shamamen 20 tonnany qurady. Alaıda úzdiksiz eksportty qamtamasyz etý úshin energetıkalyq táýelsizdik asa mańyzdy. Túrkistan oblysynyń tamaq ónerkásibi elektr energııasynyń tapshylyǵymen jıi betpe-bet keledi. Al úzdiksiz muzdatý tsıklymen jumys isteıtin kásiporyn úshin bul úlken táýekel.
Sondyqtan kompanııa qýaty 2000 kVt bolatyn jeke kún elektr stantsııasyn (KES) salýǵa shamamen 300 mln teńge ınvestıtsııa saldy. Zaýyttyń shatyryna ornatylǵan bul stantsııa óńirdegi ári Qazaqstandaǵy tamaq ónerkásibindegi eń iri ekologııalyq tehnologııalyq jobalardyń birine aınaldy.
«Joba ázirge ózin-ózi aqtaý kezeńinde. Degenmen ekonomıkalyq tıimdiligi qazirdiń ózinde baıqalyp otyr: elektr energııasyna jumsalatyn shyǵyndy aıtarlyqtaı qysqarttyq, kásiporynnyń energetıkalyq táýelsizdigin arttyrdyq jáne qalanyń elektr jelisine túsetin júktemeni azaıttyq», – deıdi Dılafrýz Madıeva.
Onyń aıtýynsha, ekologııalyq tehnologııalar qýatty óndiristik bazamen ushtasqanda ǵana joǵary nátıje beredi. 1987 jyly Birinshi Mamyr aýylynda nebári alty adam jumys isteıtin, eki ǵana balmuzdaq túrin shyǵaratyn shaǵyn tseh retinde qurylǵan otbasylyq kásip búginde aýmaǵy 3,5 gektardy qamtıtyn iri óndiris ornyna aınaldy. Óndiristik protsesterdiń avtomattandyrý deńgeıi 70 paıyzǵa jetse, ónim assortımenti 230-dan asady.
«Óńirimizdiń basty baılyǵy – adamdar. Biregeı geografııalyq ornalasýymyz ben adamı kapıtaldyń úılesýi eksportty damytýǵa zor múmkindik beredi. Bizdiń tájirıbemiz shaǵyn aýyldyń ózinde álemdik deńgeıdegi ónim óndirip, Qytaı sııaqty alyp naryqty ıgerýge bolatynyn dáleldeıdi. Biraq tabysty bıznes tek taza paıdamen ólshenbeıdi. Ol týǵan ólkeniń damýyna qosqan úlespen, qyzmetkerlerge kórsetilgen qamqorlyqpen jáne qoǵamǵa tıgizgen paıdasymen baǵalanady», – deıdi Dılafrýz Madıeva.
Kompanııa bul qaǵıdalardy naqty isterimen de dáleldep keledi. Kásiporyn Badam ózeni arqyly ótetin jaıaý júrginshiler kópirin salyp, aýyl ákimdiginiń jańa ǵımaratyn turǵyzdy. Sonymen qatar áleýmettik nysandardy turaqty jóndeýge qoldaý kórsetip, kópbalaly jáne az qamtylǵan otbasylarǵa júıeli túrde kómek kórsetip keledi.
