Qazaqstandyq onkologtar sút bezin qalpyna keltirýdiń jańa tehnologııasyn engizdi
ASTANA. KAZINFORM – Qazaqstandyq onkologtar otandyq bıomaterıaldy paıdalaný arqyly sút bezin qalpyna keltirýdiń jańa tehnologııasyn engizdi. Astanadaǵy Ulttyq ǵylymı onkologııa ortalyǵynda bir jarym jyl ishinde 120-dan astam patsıentke rekonstrýktsııalyq operatsııa jasaldy.
Ulttyq ǵylymı onkologııa ortalyǵynyń málimetinshe, sút bezin rekonstrýktsııalaýdyń jańa ádisin qoldaný baǵdarlamasy aıaqtaldy. Onyń aıasynda hırýrgter qaterli isikti alyp tastaýmen qatar, patsıentterdiń sút bezin bir operatsııa barysynda qalpyna keltirgen.
2026 jylǵy shildede operatsııa kezinde qoldanylatyn otandyq bıomaterıal medıtsınalyq buıym retinde memlekettik tirkeýden ótti. Bul ony ǵylymı joba sheńberinen tys klınıkalyq tájirıbede paıdalanýǵa múmkindik beredi.
Sút bezi obyry Qazaqstandaǵy áıelder arasynda eń kóp taralǵan onkologııalyq aýrý bolyp otyr. 2025 jyly elimizde osy derttiń 5 743 jańa jaǵdaıy tirkelgen.
Ulttyq skrınıng baǵdarlamasynyń nátıjesinde aýrý erte kezeńderde jıi anyqtala bastaǵan. Sonymen qatar ólimniń standarttalǵan kórsetkishi 100 myń áıelge shaqqanda 16,6-dan 10,2 jaǵdaıǵa deıin tómendegen.
Dárigerlerdiń aıtýynsha, búginde onkologııalyq emniń negizgi mindetteriniń biri – aýrýdy baqylaýda ustaýmen qatar, patsıentterdiń ómir sapasyn saqtaý.
Osy maqsatta bir mezgildik rekonstrýktsııa ádisi qoldanylady. ıAǵnı qaterli isik alynyp, sol operatsııa kezinde ımplant kómegimen sút beziniń pishini qalpyna keltiriledi.
– Áıel adam úshin emniń qanshalyqty sátti ótkeni ǵana emes, operatsııadan keıin ózin qalaı sezinetini de mańyzdy. Bir mezgilde rekonstrýktsııa jasaý isikti alyp tastaý men sút bezin qalpyna keltirýdi bir hırýrgııalyq aralasý aıasynda oryndaýǵa múmkindik beredi. Bul – patsıentke kórsetiletin keshendi kómektiń mańyzdy bóligi, – dedi UǴOO teri jáne jumsaq tinder isikteri, rekonstrýktıvti hırýrgııa sektorynyń aǵa ordınatory Baýyrjan Ánapııa.
Álemdik tájirıbede ımplantty senimdi bekitý jáne tinderge qajetti qoldaý kórsetý úshin arnaıy torlar men bıologııalyq matrıtsalar paıdalanylady. Alaıda olardyń ımporttyq túrleri qymbatqa túsedi.
Operatsııalardyń qoljetimdiligin arttyrý úshin UǴOO mamandary qazaqstandyq X-Matrix kompanııasy óndiretin X-Graft otandyq kollagendi matrıksin qoldanýdy qolǵa alǵan.
Bul – janýar tekti atsellıýlıarly ksenogendik bıomaterıal. Buǵan deıin ol negizinen kúıik pen jaralardy emdeýde paıdalanylǵan.
Al sút bezin qalpyna keltirý operatsııalarynda qoldaný úshin mamandar Qazaqstan Respýblıkasynyń №11199 paıdaly model patentimen qorǵalǵan arnaıy ádisteme ázirlegen.
– Bizdiń maqsatymyz ımporttyq materıaldy otandyq ónimmen jaı ǵana almastyrý emes edi. Ony naqty hırýrgııalyq mindetke beıimdeý, ıaǵnı ımplantqa qajetti tirek qalyptastyryp, tinderdiń qalpyna kelýine jaǵdaı jasaý qajet boldy. Osy maqsatta ony qoldanýdyń ózindik ádistemesin ázirlep, tájirıbege engizdik, – dedi hırýrg.
Baǵdarlama aıasynda otandyq matrıksti paıdalaný arqyly 120-dan astam bir mezgildik rekonstrýktsııalyq operatsııa sátti jasalǵan. Olardyń nátıjeleri halyqaralyq tájirıbemen salystyrylǵan.
Medıtsınalyq buıymnyń 2026 jylǵy shildede resmı tirkeý kýáligin alýy jańa tehnologııany elimizdiń basqa medıtsınalyq uıymdarynda qoldanýǵa múmkindik beredi.
– Biz mańyzdy kezeńnen óttik: otandyq matrıks memlekettik tirkeýden ótti jáne endi klınıkalyq tájirıbede qoldanyla alady. Alaıda jumysymyz munymen aıaqtalmaıdy. Aldaǵy ýaqytta patsıentterdi baqylaýdy jalǵastyryp, uzaq merzimdi nátıjeler men tehnologııanyń ekonomıkalyq tıimdiligin baǵalaýymyz qajet. Bolashaqta mundaı rekonstrýktsııalyq operatsııalar Astana qalasynda ǵana emes, Qazaqstannyń ózge óńirlerindegi áıelderge de qoljetimdi bolǵanyn qalaımyz, – dep atap ótti Baýyrjan Ánapııa.
Aıta keteıik, buǵan deıin Qazaqstanda «Qyzǵylt qazan» halyqaralyq aqparattyq naýqany aıasynda ótken Biryńǵaı ashyq esik kúninde 2 198 áıel dárigerlerdiń keńesin alǵany habarlanǵan edi. Tekserý nátıjesinde 54 áıelden qaterli isikke kúdik týdyratyn belgiler anyqtalǵan.