Qazaqstandyq ónerpazdar Cholpon-Atadaǵy «Rýh Sanat» festıvalinde júldeli boldy
ASTANA. KAZINFORM – Qazaqstan ártisteri «Rýh Sanat» birinshi dúnıejúzilik dástúrli mádenıet jáne mýzyka festıvalinde aýyzsha kásibı mýzyka óneri oryndaýshylarynyń halyqaralyq baıqaýynda jeńiske jetti, dep habarlaıdy Kazinform agenttiginiń menshikti tilshisi.
1-2 tamyz kúnderi Ystyqkól jaǵalaýynda ótken baıqaýǵa Qazaqstan, Ózbekstan, Reseı, Japonııa, Úndistan, Mysyr, Ońtústik Koreıa, Polsha, Bangladesh, Gvıneıa, Estonııa, Majarstan jáne Nepal elderinen 8 jeke oryndaýshy men 12 shyǵarmashylyq top qatysty.
Jeke oryndaýshylar arasynda 1-oryn men 200 myń som (shamamen 1 mln 242 myń teńge) júldeni qazaqstandyq Saltanat Qaıratqyzy men Dongak Naıdan (Reseı) jeńip aldy. Shyǵarmashylyq toptar arasynda birinshi oryndy «Tengri Saz» ansambli (Qazaqstan) men «Haraacha» (Reseı) ansambli bólisti. Júlde 300 myń somdy (shamamen 1 mln 863 myń teńge) qurady.
Dástúrli mádenıet pen mýzykany saqtaýǵa qosqan úlesi úshin halyqaralyq qazylar alqasynyń arnaıy dıplomymen «Káýsar» toby (Qazaqstan), «Klara Dudas and Borbala Toreky» (Majarstan) dýeti jáne «Super Trio» (Polsha) ujymy marapattaldy.
Uıymdastyrýshylar atap ótkendeı, baıqaý tájirıbe almasý men kásibı ósýdiń jandy alańǵa, materıaldyq emes mádenı murany saqtaýǵa yqpal etetin mádenı dıalog alańyna aınaldy.
«Rýh Sanat» festıvali eki jyl saıyn ótetin turaqty halyqaralyq shara bolmaq. Kelesi taqyryp etnıkalyq bıge arnalady.
Eske sala keteıik, buǵan deıin qazaqstandyq oqýshylar ınformatıkadan Halyqaralyq olımpıadada tórt medal jeńip alǵanyn jazǵan edik.