Qazaqstandyq óndirýshilerge EAEO elderiniń satyp alýlaryna qatysý jeńildeı túsedi
ASTANA. KAZINFORM – 1 shildede Eýrazııalyq ekonomıkalyq komıssııa alqasynyń otyrysynda memlekettik satyp alýlar maqsatynda taýarlardyń shyqqan elin anyqtaý qaǵıdalaryna 11-qosymshasyn alty jańa taýar pozıtsııasymen — medıtsınalyq jáne hımııalyq buıymdarmen tolyqtyrý týraly sheshim maquldandy.
Bul taýarlar shyqqan elin rastaıtyn ST-1 sertıfıkaty bolǵan jaǵdaıda EAEO elderiniń memlekettik satyp alýlaryna qatysa alady.
Bul sheshim EAEO taýarlary retinde tanylatyn ónimder tizbesin keńeıtýge jáne tıisinshe, odaqtyń barlyq múshe memleketteriniń aýmaǵynda memlekettik satyp alýlarǵa qatysý kezinde olarǵa ulttyq rejım berý maqsatynda qabyldandy.
- Mańyzdysy - buǵan deıin Reseı tarapy memlekettik satyp alýlarǵa qatysý úshin taýarlardyń shyǵarylǵan elin anyqtaý ólshemsharttaryna sáıkes keletin jekelegen ónerkásiptik taýarlarǵa ruqsat beretin qaýly qabyldaǵan bolatyn. Atap aıtqanda, taýarlardy Reseı Federatsııasy aýmaǵynda qaıta óńdeýdiń jekelegen operatsııalaryn júrgizý, óndiriletin taýarlardyń reseılik tizilimde bolýy jáne t.b., - dep jazdy Saýda jáne ıntegratsııa mınıstrliginen.
Osylaısha, ST-1 sertıfıkaty bar qazaqstandyq óndirýshiler tenderlerge jergilikti jetkizýshilermen teń jaǵdaıda qatysa alady, bul ónimderdi ótkizýge jáne naryqty keńeıtýge tolyq qoljetimdilik beredi.
- Bul sheshim - Qazaqstannyń EAEO aıasyndaǵy belsendi ustanymy men jumysynyń nátıjesi. Bul elimizdiń odaqtaǵy ekonomıkalyq múddelerin ilgeriletýge baǵyttalǵan nátıjeli jumys.
Búgingi tańda shyǵarylǵan eli ST-1 sertıfıkatymen rastalatyn taýarlar tizbesi 309 ataýdy qamtıdy (taýarlardyń tolyq tizbesin komıssııanyń resmı saıtynda kórýge bolady. Jaqyn arada bul sheshim túpkilikti bekitý úshin EEK Keńesiniń qaraýyna usynylady, - dep tolyqtyrylǵan aqparat.
Aıta keteıik, EAEO hattamasy shetelden ınternet arqyly aldyratyn taýarlardyń baǵasyn 2 paıyzǵa kóterýi múmkin.