Qazaqstandyq óndirýshilerdiń tiziliminen 7 sýbekt ne úshin shyǵaryldy
ASTANA. KAZINFORM- Jyl basynan beri Qazaqstandyq taýar óndirýshilerdiń jańartylǵan tizilimine 49,9 myńnan astam ótinim kelip tústi. Bıylǵy úsh toqsannyń qorytyndysy boıynsha 21 óndirýshiniń qyzmet kórsetkishteri tómen ekeni anyqtalyp, eki toqsan qatarynan tómen kórsetkishter tirkelýine baılanysty 7 sýbekt tizilimnen shyǵaryldy.
QR Ónerkásip jáne qurylys mınıstrligi baspasóz qyzmetiniń habarlaýynsha, tizilim iske qosylǵannan beri 71 865 taýar pozıtsııasynyń sáıkestigi rastaldy. Onyń negizgi jańashyldyǵy – satyp alý platformalarymen ıntegratsııalaý jáne kásiporyndardy 26 tsıfrlyq krıterıı boıynsha avtomatty túrde tekserý. Olardyń qatarynda shtat sany, kommýnaldyq shyǵyndar, shıkizat satyp alý jáne salyq aýdarymdary bar.
Derekter adamnyń qatysýynsyz mashınalyq oqytý algorıtmderi arqyly óńdeledi. Bul sýbektıvti tásil men sybaılas jemqorlyq táýekelderin tolyǵymen boldyrmaıdy.
Tsıfrlyq tekserý ótinim alǵash ret berilgen kezde ǵana emes, toqsan saıyn da júrgiziledi.
-Mınıstrlik memlekettik preferentsııalarǵa qol jetkizý quqyǵyn tek tıimdi jumys isteıtin jáne adal otandyq óndiristerge ǵana berýdi qamtamasyz etý maqsatynda verıfıkatsııa parametrlerin jetildirý jumystaryn jalǵastyrady,-delingen habarlamada.
Osyǵan deıin Ónerkásip jáne qurylys mınıstrligine kásipkerlerden qazaqstandyq taýar óndirýshiler reestrine engizý úshin ótinimder túsip jatqany týraly jazdyq.
