Qazaqstandyq Olımpıada chempıony jaýapty qyzmetke taǵaıyndaldy
Almatyda Qazaqstan Respýblıkasy Sý sporty túrleri federatsııasynyń konferentsııasy ótip, qazaqstandyq Olımpıada chempıony Dmıtrıı Balandın jaýapty qyzmetke taǵaıyndaldy, dep habarlaıdy Kazinform.
Atalǵan federatsııa baspasóz qyzmeti málim etkendeı, uıymnyń prezıdenti men atqarýshy komıteti qaıta saılandy.
2016 jylǵy Brazılııada ótken Olımpıada oıyndarynyń jeńimpazy Dmıtrıı Balandın federatsııanyń vıtse-prezıdenti qyzmetine taǵaıyndaldy.
«Maǵan senim artqandaryńyzǵa alǵys aıta otyryp, elimizdegi jáne halyqaralyq arenadaǵy sý sporty túrleriniń damýyna óz úlesimdi qosatynym úshin qýanyshtymyn. 2023 jyly ótken Azııa oıyndarynda bizdiń federatsııa sportshylarynyń 80 paıyzy oıyn tuǵyryna kóterildi. Bul federatsııa jumysynyń tıimdiligin dáleldeıdi. 2016 jyly jeńip alǵan Olımpıadanyń altyn medali maǵan úlken eńbektiń nátıjesinde keldi. Búginde men ózimniń tájirıbem men jigerimdi Qazaqstandaǵy sý sporty túrlerin damytyp, qoldaýǵa daıynmyn», - dedi Qazaqstan Respýblıkasy sý sporty túrleri federatsııasynyń jańa vıtse-prezıdenti Dmıtrıı Balandın.
Aıta ketelik, Balandın Rıo Olımpıadasynan bólek, 2014 jyly ótken Inchhondaǵy jazǵy Azııa oıyndarynda úsh márte jeńimpaz atanǵan. Qazirgi tańda ol sporttaǵy mansabyn aıaqtap, jaýapty qyzmetke kiristi.
Esterińizge sala keteıik, osyǵan deıin bokstan 2013 jylǵy álem chempıony, Olımpıada oıyndarynyń qatysýshysy Birjan Jaqypov «Shymkent kásipqoı boks túrleri klýby» kommýnaldyq memlekettik mekemesiniń dırektory laýazymyna taǵaıyndalǵanyn jazǵan bolatynbyz.
