Qazaqstandyq oqýshynyń TabAI startap jobasy Google grantyn ıelendi
PAVLODAR. KAZINFORM – Pavlodar qalasynyń 11 synyp oqýshysy Igor Martynıýk YC Startup School bilim berý baǵdarlamasyna tolyq grant ıelengen Ortalyq Azııadaǵy alǵashqy oqýshy atandy. Bul baǵdarlamany álemdegi eń tanymal startap akseleratorlardyń biri Y Combinator uıymdastyrady.
Oqý-aǵartý mınıstrliginiń málimetinshe, Igor TabAI startapyn óz betinshe ázirlegen. Bul jasandy ıntellekt negizinde jumys isteıtin kómekshi, ol paıdalanýshynyń tsıfrlyq belsendiligin taldap, tapsyrmalardy júıeleýge jáne jumys úderisterin basqarýǵa kómektesedi. Ónim aqparattyq júktemeni azaıtýǵa baǵyttalǵan. Qazirgi tańda TabAI platformasyn álem boıynsha shamamen 20 myń qoldanýshy paıdalanady.
Joba halyqaralyq qaýymdastyqtyń nazaryn aýdardy. Startap 35 myń dollar kólemindegi ınvestıtsııany, sondaı-aq ınfraqurylymdy damytýǵa arnalǵan Google grantyn aldy. Baǵdarlamadaǵy jas shekteýlerine qaramastan, Y Combinator komandasy Igordi shaqyrý týraly sheshim qabyldap, onyń Kremnıı alqabyndaǵy YC Startup School baǵdarlamasyna qatysý shyǵyndaryn tolyq ótedi. Onyń ishinde jol aqysy, turý jáne oqýy qarastyrylǵan.
Sonymen qatar Igor Martynıýk jasandy ıntellekt salasyndaǵy qarqyndy damyp kele jatqan Cursor kompanııasynyń resmı ambassadory atandy. Bul rólde ol Qazaqstan men Ortalyq Azııada ázirleýshiler qaýymdastyǵyn damytyp, hakatondar, mıtaptar jáne bilim berý is sharalaryn uıymdastyrady.
Igor aldaǵy ýaqytta jobany damytýdy jalǵastyryp, halyqaralyq baǵdarlamalarǵa qatysýdy jáne Y Combinator negizgi irikteýine ótinim berýdi josparlap otyr.
Aıta keteıik, buǵan deıin robototehnıka boıynsha álem chempıonatynyń júldegeri Stanford ýnıversıtetiniń grantyn ıelengen edi.
