Qazaqstandyq oqýshynyń baıandamasy Harvard Model Congress alańynda úzdik dep tanyldy
ASTANA. KAZINFORM – Qazaqstandyq mektep oqýshylarynyń MansapTeam quramasy alǵash ret bedeldi halyqaralyq kóshbasshylyq alańy – Harvard Model Congress konferentsııasyna qatysyp, el abyroıyn asqaqtatty. Konferentsııa 2026 jylǵy 16-18 qańtar aralyǵynda AQSh-tyń San-Frantsısko qalasynda ótti.
Іs-shara aıasynda qazaqstandyq delegatsııa múshesi Marııa Novosad esse baıqaýynda jeńiske jetip, Outstanding Speech atalymy boıynsha marapatqa ıe boldy. Sonymen qatar ol konferentsııaǵa qatysqan barlyq delegattardyń atynan qorytyndy sóz sóılep, halyqaralyq minberde óz oıyn erkin ári áserli jetkizdi.
Aıta keteıik, AQSh-qa sapar aldynda Marııa byltyr jazda Astanada ótken HMCKazakhstan daıarlyq baǵdarlamasy aıasynda irikteýden ótip, jan-jaqty daıyndalǵan.
Harvard Model Congress (HMC) – Garvard ýnıversıtetiniń stýdentteri uıymdastyratyn, 40 jyldan astam tarıhy bar, álemdegi eń aýqymdy saıası sımýlıatsııalyq jobalardyń biri. Konferentsııa barysynda joǵary synyp oqýshylary AQSh Kongresi men halyqaralyq uıymdardyń jumysyn ázirlep, jahandyq kún tártibindegi ózekti máselelerdi talqylaıdy, aǵylshyn tilinde pikirtalas pen sheberlik sabaqtaryna qatysady.
HMC konferentsııalary jyl saıyn álemniń ár óńirinde – AQSh-ta, Eýropada, Azııada jáne Taıaý Shyǵysta ótkiziledi. Al negizgi basqosýlar dástúrli túrde Boston men San-Frantsısko qalalarynda uıymdastyrylady. Konferentsııaǵa túrli memleketten kelgen daryndy joǵary synyp oqýshylar qatysady.
Eske sala keteıik, buǵan deıin Almaty qalasynda «Sırıýs» bilim berý ortalyǵymen áriptestik aıasynda ótken І Talanttar sammıti barysynda jańa mektep pen bilim berý ortalyǵynyń irgetasyn qalaý rásimi ótken bolatyn.
