Qazaqstandyq oqýshylardyń ınjenerlik jobasy AQSh-taǵy álem chempıonatynda TOP-15-ke endi
ASTANA. KAZINFORM – Qazaqstandyq oqýshylar sý asty robototehnıkasynan AQSh-ta ótken International SeaPerch Challenge 2026 álem chempıonatynda joǵary nátıje kórsetti.
2026 jylǵy 30-31 mamyrda University of Maryland bazasynda ótken halyqaralyq fınalda Qazaqstan atynan Bıbigúl Tólegenova atyndaǵy shyǵarmashylyq mekteptiń «Nomadic Guardians» komandasy óner kórsetti.
Komanda quramynda Ersultan Muqataı, Daıana Jumahan, Ámına Ómirzakova, Adel Baýyrjanova, Ámirhan Elýbaı, ıAroslav Vrýblevskıı, Azat Oral, Malıka Noǵaeva jáne Álıhan Muhtaruly boldy.
Oqýshylardy Shyńǵys Ahmetýlaev, Anel Saýdanbekova jáne Daryn Ibraev jetekshilik etip daıyndaǵan.
Álem chempıonatynyń tehnıkalyq aýdıt sektsııasynda qazaqstandyq komandanyń ınjenerlik esebi joǵary baǵalandy.
– Qazylar alqasy ınjenerlik jobaǵa múmkin bolǵan 94 baldyń 88-in berdi. Nátıjesinde «Nomadic Guardians» komandasy Technical Design Report nomınatsııasy boıynsha álemdik reıtıngte 15-orynǵa kóterildi, – delingen habarlamada.
Baıqaýǵa álemniń túkpir-túkpirinen kelgen 210-nan astam úzdik tehnologııalyq komanda qatysty.
Qazaqstandyq robototehnıkter tehnıkalyq aýdıt boıynsha ondaǵan sheteldik komandany artta qaldyrdy.
Komanda AQSh-taǵy álemdik fınalǵa joldamany buǵan deıin Birikken Arab Ámirlikterinde ótken SeaPerch West Asia aımaqtyq kýboginde joǵary sanat boıynsha absolıýtti jeńimpaz ataný arqyly ıelengen bolatyn.
– Bul nátıje qazaqstandyq oqýshylardyń ınjenerlik daıarlyǵynyń joǵary deńgeıin jáne halyqaralyq arenadaǵy básekege qabilettiligin taǵy bir márte kórsetti, – dep atap ótti uıymdastyrýshylar.
Aıta keteıik, endi elimizdegi barlyq stýdent jasandy ıntellekt pánin oqıdy.
