Qazaqstandyq oqýshylardan asqorytý, júıke jáne kóz aýrýlary jıi anyqtalady

ASTANA. KAZINFORM – Densaýlyq saqtaý mınıstri Aqmaral Álnazarova oqý jylyn qorytyndylap, mektep oqýshylary arasynda qandaı aýrýlar jıi kezdesetinin aıtyp berdi.

«Balalar arasynda aýrýshańdyq qurylymy boıynsha birinshi orynda – asqorytý júıesi aýrýlary (9,7%), ekinshi orynda – júıke júıesi aýrýlary (9,1%) jáne úshinshi orynda kóz aýrýlary (8,3%) tur», - dedi Densaýlyq saqtaý mınıstri Úkimettiń búgingi otyrysynda.

Onyń aıtýynsha, Qazaqstan halqynyń 19%-yn jáne elimizdegi barlyq balanyń 57%-dan astamyn mektep jasyndaǵy balalar quraıdy.

«Elimizde 7 myńnan astam mektep jumys isteıdi. Árbir mektep sol aýmaqqa qyzmet kórsetetin emhanaǵa bekitilgen. Mektepterdiń 90% meıirgermen qamtylǵan. Jyl saıyn emhanalar 17 jasqa deıingi balalardy profılaktıkalyq tekserýden ótkizedi», - deıdi A. Álnazarova.

Osylaısha, 2023 jyldyń qorytyndysynda mektep jasyndaǵy 5,5 mln bala profılaktıkalyq tekserýden ótip, 9,3%-ynda túrli aýrýshańdyq anyqtalǵan. Nátıjesinde 210 myń bala dıspanserlik esepke alynǵan.