Qazaqstandyq oqýshylar JI olımpıadasynda rekordtyq nátıje kórsetti

ASTANA. KAZINFORM — Qazaqstandyq oqýshylar Pekınde ótken IOAI 2025 Halyqaralyq jasandy ıntellekt olımpıadasynda joǵary nátıje kórsetip, 3 altyn, 1 kúmis jáne 3 qola medal jeńip aldy. Bul — el quramasynyń osy dodadaǵy rekordtyq jetistigi.

Olımpıada 2-9 tamyz aralyǵynda Qytaı astanasynda ótip, 61 elden 77 komanda qatysqan. Qazaqstan namysyn eki komanda qorǵap, beıresmı komandalyq esepte altyn medal sany boıynsha Polsha, Úndistan jáne Vetnammen birge ekinshi oryndy bólisti. Birinshi oryndy Reseı komandasy (6 altyn) ıelendi.

Altyn medal ıegerleri – Qasymqan Jánibek, Ábý Qanabek jáne Sultanbı Isataı. Kúmis medaldi Aýshahman Tálim alsa, qola júldeni Tımýr Shakýov, Dáýjan Beketov jáne Sultanbek Sary enshiledi.

Olımpıada barysynda komandany qoldaǵany úshin Batyr Erdenov uıymdastyrý komıtetiniń arnaıy alǵys hatymen marapattaldy.

- IOAI – oqýshylar arasyndaǵy bedeldi ǵylymı-tehnıkalyq jarys. Qatysýshylar jasandy ıntellekt salasyna qatysty praktıkalyq jáne teorııalyq tapsyrmalardy oryndaıdy. Baıqaý aıasynda álemdik sarapshylardyń dáristeri men pikirtalastar, mádenı jáne bilim berý is-sharalary da uıymdastyryldy, - dep túsindirdi Tsıfrlyq damý, ınnovatsııalar jáne aeroǵarysh ónerkásibi mınıstrliginen.

Qazaqstan quramasynyń bas seriktesi – Astana Hub halyqaralyq IT klasteri. Klaster komanda daıyndyǵyna eleýli úles qosyp, jas talanttardy qoldaýǵa baǵyttalǵan jumystar atqardy.

Ulttyq quramanyń bul jetistigi – elimizdegi IT-bilim berýdiń sapasyn jáne oqýshylardyń ozyq tehnologııalarǵa qyzyǵýshylyǵyn aıǵaqtaıtyn mańyzdy kórsetkish.

Aıta keteıik, Qazaqstandyq oqýshylar ınformatıkadan Halyqaralyq olımpıadada tórt medal utty.