Qazaqstandyq oqýshylar Túrkııada ulttyq sportty pash etti
ASTANA. KAZINFORM – Sportshy, rekordshy Temir Spataı men «Bala Tolaǵaı» ulttyq sport federatsııasynyń qatysýshylary Túrkııaǵa baryp, qazaqtyń ulttyq sportyn halyqaralyq deńgeıde tanystyrdy.
Federatsııa ókiliniń aıtýynsha, bastama – mektep oqýshylary arasynda ulttyq sportty damytýǵa baǵyttalǵan júıeli jumystyń jalǵasy. Búginde «Bala-Tolaǵaı» jobasyna qatysýshy balalardyń qatary artyp keledi.
– Ystanbulda ulttyq oıyndarymyzdy tanystyrdyq. Onyń ishinde asyq atý, sadaq atý, bes asyq sekildi oıyndar qamtyldy. Qazaq sportyn, qazaq balalarynyń ónerin tamashalaýǵa kelgen jurt zalǵa syımaı qaldy, – dedi federatsııanyń prezıdenti Sholpan Shaımardanqyzy.
Sapar jas sportshylar úshin úlken tájirıbe alańyna aınalǵan.
– Túrkııadaǵy qazaqtar qatty qýandy. Basynda qatty qobaljydyq, keıin ulttyq sportty nasıhattaýǵa barymyzdy saldyq, – deıdi qatysýshy Merýert Zamalıeva.
Sonymen qatar shara barysynda oqýshylar tek sporttyq oıyndarmen shektelmeı, ulttyq mádenıetti jan-jaqty dáripteýge de erekshe mán bergen.
– Sharada óleń oqyp, ulttyq kod pen dástúrimizdi dáripteýge atsalystyq, – deıdi taǵy bir qatysýshy Órken Jańabaı.
Federatsııa ókiliniń aıtýynsha, mundaı halyqaralyq jobalar aldaǵy ýaqytta da jalǵasyn tabady. Sebebi jas urpaqtyń boıynda ulttyq sportqa degen qyzyǵýshylyq pen janashyrlyqty qalyptastyrý – basty mindetterdiń biri.
Eske salaıyq, Túrkistan qalasynda kókpardan álem chempıonaty ótip jatyr.
