Qazaqstandyq oqýshylar Sochıde ótken olımpıadada 6 medal ıelendi
ASTANA. KAZINFORM — Reseıdiń Sochı qalasynda ótken jasóspirimder arasyndaǵy IJSO-2025 halyqaralyq jaratylystaný olımpıadasy óz máresine jetti, dep habarlaıdy Oqý-aǵartý mınıstrliginiń baspasóz qyzmeti.
Bilim dodasyna álemniń 21 elinen 120-dan astam oqýshy qatysyp, fızıka, hımııa jáne bıologııa pánderi boıynsha óz bilimderin synǵa saldy.
Qazaqstan quramasy 6 oqýshydan jáne 3 jetekshiden turdy. Olar jarys qorytyndysy boıynsha 100% nátıje kórsetip, alty medal jeńip aldy.
Kúmis medal ıegerleri:
Ratmır Kýtyrev — Almaty qalasyndaǵy RFMM 10-synyp oqýshysy;
Danııl Perepelıtsa — Pavlodar qalasynyń daryndy balalarǵa arnalǵan № 8 lıtseı-mektebiniń 9-synyp oqýshysy;
Mýhammad Syzdyqov — Jambyl oblystyq daryndy er balalarǵa arnalǵan mamandandyrylǵan Bilim-ınnovatsııa lıtseı-ınternatynyń 10-synyp oqýshysy.
Qola medal ıegerleri:
Tımýr Alpysbaev — Astana qalasyndaǵy «NURORDA» mektep-lıtseıiniń 9-synyp oqýshysy;
Erasyl Dúısenbekov — Abaı oblystyq daryndy balalarǵa arnalǵan mamandandyrylǵan Bilim-ınnovatsııa lıtseıiniń 10-synyp oqýshysy;
Nurseıit Seıtqazıev — Aqtóbe oblystyq daryndy jasóspirimderge arnalǵan mamandandyrylǵan Bilim-ınnovatsııa lıtseı-ınternatynyń 9-synyp oqýshysy.
Budan buryn jaratylystaný baǵytyndaǵy Aýyl olımpıadasynda 200 oqýshy jeńimpaz atanǵanyn jazǵan edik.