Qazaqstandyq oqýshylar Shanhaıdaǵy VEX Robotics týrnırinde úsh júldeni jeńip aldy
ASTANA. KAZINFORM - Qazaqstandyq oqýshylar Qytaıdyń Shanhaı qalasynda ótken VEX Robotics halyqaralyq týrnırinde júldeli oryndarǵa ıe boldy.
24–27 tamyz aralyǵynda Shanhaıdyń Lıngan aýdanynda uıymdastyrylǵan jarysqa segiz sanat boıynsha 150 komanda, 1400-den astam bala qatysty.
Qazaqstandyq jas robototehnıkter VIQRC orta býyn sanatynda synǵa tústi.
Bul sanatta 46 komanda baq synady. Jarys qorytyndysy boıynsha, Qazaqstannyń 1771A komandasy III oryn ıelendi.
Komanda quramynda Qaıyrbek Arnur, Joltaı Beknazar jáne Kúntýǵan Hanzada óner kórsetti. Budan bólek, dál osy komanda Best Progress Award arnaıy júldesin ıelendi. Bul marapat komanda jetistigindegi eleýli ilgerileýdi baǵalaıtyn arnaıy atalym.
Qazaqstannyń 1771T komandasy da III orynǵa ıe boldy. Komanda sapynda Tamerlan Samyratov, Jaqsymbet Ývaısov jáne Alınur Qýat óner kórsetti.
Osylaısha, qazaqstandyq eki komanda Shanhaıdaǵy halyqaralyq týrnırde eki úshinshi oryn jáne bir arnaıy júldege ıe boldy.
Oqýshylardy jarysqa robototehnıka jetekshisi Naǵashybaı Muhameduly Samyratov daıyndady.
VEX Robotics jarystarynda qatysýshylar robottardy qurastyryp, baǵdarlamalaıdy jáne belgilengen tapsyrmalardy oryndaý úshin ınjenerlik ári strategııalyq sheshimder ázirleıdi.
Osyǵan deıin qazaqstandyq oqýshylardyń Beıjińde robototehnıkadan ótken halyqaralyq chempıonatta 23 júlde ıelengeni týraly jazdyq.
