Qazaqstandyq oqýshylar PISA-2025 zertteýinde qandaı nátıje kórsetti
ASTANA. KAZINFORM – Qazaqstandyq oqýshylar PISA-2025 halyqaralyq zertteýinde jaratylystaný-ǵylymı saýattylyq boıynsha orta eseppen 420, matematıkadan 414, oqý saýattylyǵynan 385 ball jınady, dep habarlaıdy Oqý-aǵartý mınıstrligi.
Ekonomıkalyq yntymaqtastyq jáne damý uıymy PISA-2025 halyqaralyq zertteýiniń nátıjelerin jarııalady. Qazaqstanda zertteý 2025 jylǵy sáýir-mamyr aılarynda júrgizilip, oǵan elimizdiń barlyq óńirindegi 643 bilim berý uıymynan 15 jastaǵy 22 680 bilim alýshy qatysty.
Jalpy PISA-2025 zertteýi 91 el men aýmaqty qamtydy. Oǵan 15 jastaǵy 760 myńnan astam bilim alýshy qatysty.
Bul tsıkldiń basty erekshelikteriniń biri – «Tsıfrlyq álemde bilim alý» jańa ınnovatsııalyq baǵytynyń engizilýi. Ol oqýshylardyń jańa bilimdi óz betinshe meńgerý jáne tsıfrlyq ortada túrli mindetterdi sheshý qabiletin baǵalaıdy.
Zertteý nátıjesi boıynsha qazaqstandyq oqýshylardyń 80%-y sabaq barysynda jasandy ıntellekt kómegimen jasalǵan kontentpen jumys isteıdi. EYDU elderi boıynsha ortasha kórsetkish – 63%.
Sondaı-aq qazaqstandyq bilim alýshylardyń 85%-y tsıfrlyq qurylǵylardy paıdalanýǵa qatysty pándik usynymdar qoldanylatyn mektepterde oqıdy. EYDU boıynsha bul kórsetkish 71%-dy qurady.
Balalardyń qaýipsizdigi boıynsha da birqatar kórsetkish tirkeldi. Qazaqstandyq oqýshylardyń 77%-y býllıngke tap bolmaıtynyn aıtqan. EYDU elderi boıynsha ortasha kórsetkish – 53%.
– Qazaqstandaǵy bilim alýǵa qolaıly tártiptik ahýal ındeksi 0,80-di qurady, bul EYDU boıynsha ortasha kórsetkishten – 0,14-ten edáýir joǵary. Sonymen qatar oqýshylardyń 71%-y mekteptiń olardy bolashaq ómirge qajetti deńgeıde daıyndaıtynyn atap ótti. EYDU boıynsha ortasha kórsetkish 51%-dy quraıdy, – delingen mınıstrlik habarlamasynda.
Pedagogterdiń qoldaýy boıynsha Qazaqstannyń ındeksi 0,65-ti qurady, al EYDU boıynsha bul kórsetkish – 0,03. Oqýshylardyń ózara bilim alýy boıynsha Qazaqstandaǵy kórsetkish 87%-ǵa jetse, EYDU boıynsha 51% boldy.
Qazaqstandyq bilim alýshylardyń 75%-y ósýge baǵyttalǵan oılaý ustanymyn kórsetken. Bul EYDU boıynsha ortasha kórsetkishten – 69%-dan joǵary. Kognıtıvtik beıimdelý ındeksi de Qazaqstanda 0,21-di, EYDU boıynsha 0,01-di qurady.
Zertteý barysynda oqýshylardyń ekologııalyq habardarlyǵy da baǵalandy. Qazaqstannyń ekologııalyq habardarlyq, pozıtıvti ekologııalyq ustanymdar jáne ekologııalyq bilim alý múmkindikteri boıynsha ındeksteri EYDU elderiniń ortasha kórsetkishterinen joǵary bolǵan.
PISA-2025 baǵalaýynyń negizgi baǵyty jaratylystaný-ǵylymı saýattylyq boldy. Qazaqstandyq oqýshylar bul baǵytta orta eseppen 420 ball jınady. Matematıka boıynsha nátıje – 414 ball, oqý saýattylyǵy boıynsha – 385 ball.
Jaratylystaný-ǵylymı jáne oqý saýattylyǵy boıynsha nátıjeler PISA-2022 deńgeıinde saqtalǵan. Jaratylystaný boıynsha kórsetkish 2018 jylǵy deńgeıden joǵary, al oqý saýattylyǵy boıynsha uzaq merzimdi turaqtylyq saqtalyp otyr.
Sonymen birge zertteý Qazaqstannyń bilim berý júıesinde jumysty kúsheıtýdi qajet etetin birqatar baǵytty kórsetti. Olardyń qatarynda óńirler men mektepter arasyndaǵy aıyrmashylyqtardy qysqartý, bilim alýshylardyń bazalyq bilimi men daǵdylaryn nyǵaıtý jáne oqytý sapasyn arttyrý bar.
PISA-2025 nátıjelerine egjeı-tegjeıli taldaý jasalǵannan keıin Ahmet Baıtursynuly atyndaǵy «Taldaý» ortalyǵy Y. Altynsarın atyndaǵy Ulttyq bilim akademııasymen birlesip, óńirler boıynsha bilim berý júıesiniń kórsetkishterin odan ári jaqsartýǵa arnalǵan usynymdar ázirleıdi.
Aıta keteıik, Qazaqstan talanttardyń básekege qabilettiligi ındeksinde birden 39 satyǵa kóterildi.
