Robototehnıka: qazaqstandyq oqýshylar Panamada tórt dúrkin álem chempıony atandy
ASTANA. KAZINFORM - Qazaqstan oqýshylarynyń robototehnıkadan Ulttyq quramasy Panama-Sıtıde ótken FIRST Global Challenge (FGC) 2025 Búkilálemdik Olımpıadasynda bıyl qatarynan tórtinshi jyl aıryqsha jeńiske jetip, taǵy da tarıhı jetistikke qol jetkizdi.
QR Oqý-aǵartý mınıstrligi baspasóz qyzmetiniń habarlaýynsha, álemniń 190 elinen kelgen komandalardyń ishinen qazaqstandyq oqýshylar birinshi oryndy ıelendi. Sonymen qatar olar birden eki joǵary marapatty jeńip aldy. Ol robottardyń biliktilik oıyndarynda rekord ornatqan absolıýtti chempıondarǵa beriletin týrnırdiń bas júldesi - GRAND CHALLENGE AWARD (altyn).
Al ALBERT EINSTEIN AWARD (altyn) - Úzdik ınjenerlik ázirlemeleri, tehnıkalyq sheberlikteri men komandalyq jumys jáne kóshbasshylyq jetistikteri úshin beriletin joǵarǵy tóreshilik marapat. Bul marapatta keshendi artyqshylyq pen ınnovatsııa eskeriledi.
Elimizdiń quramasyn NIS Almaty-Medeý mektebiniń 9-10 synyp oqýshylary Rashat Dosymjan, Dáýlet Іlııas, Orynbasarov Álıhan, Ásetuly Madııar jáne Tursynbaev Nurasyl tanystyrdy. Jattyqtyrýshylary – Nurdáýlet Dosmaǵambet, Asylbek Murzahmetov jáne Dýlat Baıtúlenov.
Búkilálemdik chempıonatta qatarynan tórt ret jeńiske jetý (Jeneva-2022, Sıngapýr-2023, Grekııa-2024, Panama-2025) Qazaqstandy halyqaralyq STEM-bilim berý arenasyndaǵy absolıýtti álemdik kóshbasshyǵa aınaldyrady.
«Bizdiń balalarymyz tórtinshi ret qatarynan jeńiske jetti. Bul rette, komandanyń quramy birde-bir ret qaıtalanbaǵanyn atap ótken jón – jyl saıyn el namysyn qorǵaý úshin jańa qatysýshylardy daıyndaımyz», – dedi USTEM Foundation Qoǵamdyq qorynyń jetekshisi Asylbek Myrzahmetov.
Eske sala keteıik, bıylǵy jarystyń «Eco-Equilibrium» taqyryby jahandyq ekologııalyq problemalardy sheshýge jáne bıoártúrlilikti saqtaýǵa arnalǵan bolatyn. Qazaqstandyq komanda robotty ázirleý arqyly ekojúıelerdi qalpyna keltirýge erekshe kózqaras tanytty. Olardyń roboty oıyn alańyndaǵy kedergilerdi alyp tastap, bıoártúrlilik birlikterin ekojúıelerge dál ornalastyratyn kúrdeli fınaldyq tapsyrmany sátti oryndap shyqty.
Ulttyq quramany QR Oqý-aǵartý mınıstrliginiń «Daryn» RǴPO, «USTEM Foundation» QQ, Alem.AI Halyqaralyq jasandy ıntellekt ortalyǵy, sondaı-aq qazaqstandyq Cannect.AI startapy qoldaǵanyn atap ótken jón.
Osyǵan deıin qazaqstandyq oqýshylardyń FIRST GLOBAL álemdik robototehnıka olımpıadasyna qatysyp jatqany týraly jazdyq.