Qazaqstandyq oqýshylar matematıka olımpıadasynda álemniń úzdik 25 quramasynyń qataryna endi
ASTANA. KAZINFORM - Qazaqstannyń ulttyq quramasy 1959 jyldan beri ótkizilip kele jatqan mektep oqýshylary arasyndaǵy eń kóne ári eń bedeldi halyqaralyq pándik jarys - 67-shi Halyqaralyq matematıka olımpıadasynda (IMO) joǵary nátıje kórsetti, dep habarlaıdy QR Oqý-aǵartý mınıstrliginiń baspasóz qyzmeti.
117 eldiń oqýshylary qatysqan olımpıadanyń beıresmı komandalyq medaldyq esebiniń qorytyndysy boıynsha Qazaqstan álemniń úzdik 25 quramasynyń qataryna enip, 22-orynǵa turaqtady. Ulttyq quramanyń barlyq alty múshesi júldeger atanyp, úsh kúmis jáne úsh qola medal ıelendi.
Halyqaralyq matematıka olımpıadasyndaǵy bul jetistik Qazaqstannyń ulttyq quramalary úshin nátıjeli ótken shilde aıynyń jarqyn qorytyndysy boldy. Bir aıdyń ishinde qazaqstandyq oqýshylar fızıka, hımııa, bıologııa, matematıka jáne ekonomıka pánderi boıynsha ótken halyqaralyq olımpıadalarda 24 medal jeńip aldy. Eń bastysy - atalǵan bes halyqaralyq olımpıadanyń barlyǵynda Qazaqstannyń árbir qatysýshysy júldeger atandy.
Bul jetistikter Memleket basshysy Qasym-Jomart Toqaevtyń daryndy balalardy qoldaý, olardyń qabiletin damytý jáne halyqaralyq deńgeıde básekege qabiletti urpaq qalyptastyrý jónindegi júıeli saıasatynyń naqty nátıjesi bolyp tabylady. Sonymen qatar, bul daryndy oqýshylardy anyqtaý, qoldaý jáne halyqaralyq deńgeıdegi zııatkerlik jarystarǵa júıeli daıarlaý jumysynyń tıimdiligin taǵy bir márte dáleldeıdi.
Kolýmbııada ótken 56-shy Halyqaralyq fızıka olımpıadasynda (IPhO) 85 elden 381 oqýshy baq synady. Qazaqstan quramasy tarıhı jetistikke qol jetkizip, alǵash ret ulttyq quramanyń barlyq bes múshesi altyn medal jeńip aldy. Eger 2025 jyly komanda eki kúmis jáne úsh qola medal enshilese, bıyl bes altyn medalǵa qol jetkizdi. Beıresmı komandalyq medaldyq eseptiń qorytyndysy boıynsha Qazaqstan álemniń úzdik quramalarymen birge 1-oryndy bólisti.
Tashkent qalasynda ótken 58-shi Halyqaralyq hımııa olımpıadasynda (IChO) 90-nan astam elden 350-den astam oqýshy qatysty. Qazaqstannyń tórt qatysýshysynyń barlyǵy júldeger atanyp, bir altyn jáne úsh kúmis medal jeńip aldy. Nátıjesinde ulttyq qurama beıresmı komandalyq medaldyq esepte úzdik ondyqqa enip, 10-oryndy ıelendi.
Vılnıýs qalasynda ótken 37-shi Halyqaralyq bıologııa olımpıadasynda (IBO) 84 elden 330-dan astam oqýshy baq synady. Qazaqstan quramasynyń barlyq múshesi júldeger atanyp, úsh kúmis jáne bir qola medal ıelendi. Osylaısha, ulttyq qurama 1996 jyly qol jetkizilgen osy olımpıadadaǵy Qazaqstannyń eń úzdik nátıjesin qaıtalady. Ótken jyly tórt qola medal jeńip alǵan komandamen salystyrǵanda, bıylǵy kórsetkish aıtarlyqtaı jaqsardy. Beıresmı komandalyq medaldyq esepte Qazaqstan 18-orynǵa turaqtady.
Qytaıda ótken Halyqaralyq ekonomıka olımpıadasynda (IEO) 61 elden shamamen 300 oqýshy qatysty. Qazaqstan quramasy bul dodada da júz paıyzdyq nátıjege qol jetkizip, bir altyn, úsh kúmis jáne bir qola medal jeńip aldy. Qazaqstandyq Muhtarhan Batyrhan IEO olımpıadasynyń altyn medalin ekinshi ret ıelendi. Beıresmı komandalyq medaldyq esepte Qazaqstan úzdik ondyqqa enip, 10-orynnan kórindi.
Shilde aıyndaǵy halyqaralyq olımpıadalardyń qorytyndylary Qazaqstannyń álemdegi jetekshi zııatkerlik quramalardyń qataryndaǵy ornynyń nyǵaıyp kele jatqanyn kórsetti. Fızıkadan beıresmı komandalyq esepte 1-oryn, hımııa men ekonomıkadan úzdik ondyqqa ený, bıologııadan 18-oryn jáne matematıkadan álemniń úzdik 25 quramasynyń qataryna qosylý elimizdegi daryndy oqýshylardy halyqaralyq deńgeıde daıarlaý júıesiniń tıimdiliginiń kezekti dáleli boldy.
Halyqaralyq olımpıadalar maýsymy jalǵasýda. Tamyz aıynda Qazaqstannyń ulttyq quramalary Halyqaralyq ınformatıka olımpıadasyna (IOI), Halyqaralyq geografııa olımpıadasyna (IGeO) jáne Halyqaralyq lıngvıstıka olımpıadasyna (IOL) qatysady. Atalǵan olımpıadalardyń qorytyndysy boıynsha Qazaqstan 2026 jylǵy eń iri jeti halyqaralyq pándik olımpıadanyń barlyǵyna qatysý tsıklin aıaqtaıdy.
Aıta keteıik, sońǵy bes jylda erekshe bilim berý qajettiligi bar talapkerler sany shamamen toǵyz ese artty.
