Oqýshylar kóktemgi kanıkýlda neshe kún demalady?

ASTANA. KAZINFORM — Úshinshi toqsannyń aıaqtalýyna sanaýly kúnder qaldy. Kóktemgi kanıkýl kezeńi 2025 jyldyń 21 naýryzy men 2025 jyldyń 31 naýryzyn qosa alǵanda on bir kúnge jalǵasady.

Oqý-aǵartý mınıstrligi baspasóz qyzmetiniń málimetinshe, mektep oqýshylarynyń kóktemgi demalystaǵy bos ýaqytyn tıimdi ótkizý jáne jeke tulǵalyq qasıetterin damytý maqsatynda «Birtutas tárbıe» baǵdarlamasy aıasynda is-sharalar jospary jasaldy. Sondaı-aq 1-4, 5-9 jáne 10-11 synyp oqýshylaryna arnalǵan gaıdbýk ázirlendi. Onda ár demalys kúni Naýryznamanyń onkúndigimen baılanysty jáne qoǵamnyń mańyzdy aspektilerine: otbasylyq qundylyqtarǵa, mádenıetke, ulttyq dástúrlerge, qaıyrymdylyqqa, sportqa mán berildi. Ol boıynsha mektepterde birqatar bilim berý, sporttyq, mádenı jáne shyǵarmashylyq is-sharalar ótkizý josparlanǵan:

• teatr festıvalderi men qoıylymdary;
• sheberlik sabaqtary;
• qaýipsizdik sabaqtary;
• murajaılarǵa, ǵylymı ortalyqtarǵa jáne tarıhı eskertkishterge tanymdyq ekskýrsııalar;
• sporttyq oıyndar;
• qaıyrymdylyq aktsııalary jáne basqa da sharalar.

— Eń bastysy — balalardyń qaýipsizdigin qamtamasyz etý. Osy maqsatta ata-analarmen birge jol-kólik jaraqattarynyń aldyn alýǵa, mekteptiń ishki tártibin saqtaýǵa, balalardyń kóshedegi qaýipsizdigine, úıdegi órt qaýipsizdigi jáne kıberqaýipsizdikke erekshe nazar aýdarylady, — delingen mınıstrlik habarlamasynda.

Aıta keteıik, bul is-sharalar bilim berý uıymdaryna ádistemelik usynym retinde joldanady.

Buǵan deıin petropavldyq oqýshy balalardyń oı-órisin damytatyn matematıkalyq oıyn jasap shyqqanyn jazǵan edik.