Qazaqstandyq oqýshylar ınformatıkadan halyqaralyq bedeldi jarysta 3 medal jeńip aldy
ASTANA. KAZINFORM — 2026 jylǵy 24-30 shilde aralyǵynda Lıtva Respýblıkasynyń Kaýnas qalasynda ınformatıkadan Eýropalyq jasóspirimder olımpıadasy (European Junior Olympiad in Informatics, EJOI 2026) ótti.
Oqý-aǵartý mınıstrliginiń habarlaýynsha, bilim dodasyna 25 elden 100-den astam oqýshy qatysty. EJOI — 16 jasqa deıingi mektep oqýshylaryna arnalǵan ınformatıka salasyndaǵy eń bedeldi halyqaralyq olımpıadalardyń biri. Ol daryndy oqýshylardyń baǵdarlamalaý, algorıtmdeý jáne kompıýterlik ǵylymdar baǵytyndaǵy qabiletterin damytýǵa arnalǵan.
Olımpıada eki jarys kúninen turdy. Qatysýshylar ártúrli kúrdelilik deńgeıindegi algorıtmdik esepterdi sheship, bilimderi men praktıkalyq daǵdylaryn synǵa saldy.
Qazaqstan namysyn jalpy bilim beretin pánder boıynsha respýblıkalyq olımpıadanyń ınformatıka páninen jeńimpazdary men júldegerlerinen jasaqtalǵan ulttyq qurama qorǵady.
Jarys qorytyndysy boıynsha Qazaqstan quramasy bir altyn, bir kúmis, bir qola medal jáne bir maqtaý gramotasyn ıelendi:
- Elaman Álisher, Almatydaǵy Respýblıkalyq fızıka-matematıka mektebiniń 8-synyp oqýshysy — altyn medal;
- Belgimbaev Ámir, Almatydaǵy Respýblıkalyq fızıka-matematıka mektebiniń 9-synyp oqýshysy — kúmis medal;
- Ermuhanov Islam, Aqtóbe oblystyq mamandandyrylǵan «Bilim-Innovatsııa» lıtseı-ınternatynyń 9-synyp oqýshysy — qola medal;
- Jangeldi Sanjar, Qaraǵandy oblystyq N. Nurmaqov atyndaǵy mamandandyrylǵan mektep-lıtseı-ınternatynyń 9-synyp oqýshysy — maqtaý gramotasy.
Aıta keteıik, 2025 jyly Qazaqstan quramasy EJOI olımpıadasynda 1 kúmis jáne 3 qola medal ıelengen bolatyn. Bıyl ulttyq quramanyń qorjyny altyn medalmen tolyqty.
Eske salaıyq, buǵan deıin qazaqstandyq oqýshylar matematıka olımpıadasynda álemniń úzdik 25 quramasynyń qataryna engenin jazǵanbyz.
