Qazaqstandyq oqýshylar halyqaralyq jasandy ıntellekt olımpıadasynda 4 júlde aldy
ASTANA. KAZINFORM — Qazaqstan quramasy jasandy ıntellekt boıynsha ótken alǵashqy Ortalyq Eýropa olımpıadasynda — EUROAI 2026 jarysynda tabysty óner kórsetip, tórt medal: bir altyn, eki kúmis jáne bir qola júlde ıelendi.
Qazaqstannyń Sporttyq baǵdarlamalaý federatsııasy baspasóz qyzmeti málimetinshe, EUROAI — jyl saıyn ótetin jasandy ıntellekt boıynsha óńirlik olımpıada. Qatysýshylar mashınalyq oqytý (ML), tereń oqytý (DL), tabıǵı tildi óńdeý (NLP) jáne kompıýterlik kórý (CV) salalaryndaǵy tapsyrmalardy jeke oryndaıdy.
Olımpıada 2026 jylǵy 14-19 shilde aralyǵynda Rýmynııanyń Klýj-Napoka qalasyndaǵy Babesh-Boııaı ýnıversıtetiniń bazasynda ótti. Qazaqstan quramasy Eýropanyń eń myqty komandalarymen qatar jarysqa onlaın formatta qatysty.
Olımpıada qorytyndysy boıynsha Ábý Qanabek altyn medal jeńip aldy. Islamnýr Hýsaınov pen Daýjan Beketov kúmis júldeger atandy. Sultanbı Isataı qola medal ıelendi.
Eki jarys kúni boıy qatysýshylar jasandy ıntellekt modelderin nólden ázirlep, baǵdarlamalaý, derekterdi taldaý jáne mashınalyq oqytý salalaryndaǵy bilimdi talap etetin praktıkalyq tapsyrmalardy oryndady. Olımpıada formaty oqýshylarǵa tehnıkalyq daıyndyǵyn ǵana emes, shekteýli ýaqyt jaǵdaıynda tıimdi sheshim taba bilý qabiletin de kórsetýge múmkindik berdi.
— Jas órenderimiz EUROAI 2026 olımpıadasynda tabysty óner kórsetip, Qazaqstannyń jasandy ıntellekt pen sporttyq baǵdarlamalaý mektebi álemdik deńgeıde básekege qabiletti ekenin taǵy bir márte dáleldedi. Mundaı joǵary nátıje kezdeısoq emes — bul jas talanttardy qoldaýǵa baǵyttalǵan júıeli jumystyń jemisi. Balalarymyzdy maqtan tutamyn! — dedi Qazaqstannyń Sporttyq baǵdarlamalaý federatsııasynyń basshysy Baǵdat Mýsın.
Aıta keteıik, Qazaqstan quramasynyń kelesi halyqaralyq jarysy 2026 jyldyń 2-8 tamyz aralyǵynda Astanada ótetin Jasandy ıntellekt boıynsha halyqaralyq olımpıada (IOAI) bolmaq. Álemdik dodaǵa 110 elden 500-ge jýyq oqýshylar qatysady.
Buǵan deıin qazaqstandyq oqýshylar halyqaralyq ekonomıka olımpıadasynda bes medal jeńip alǵany belgili boldy.
