Qazaqstandyq oqýshylar halyqaralyq olımpıadalardan 1000-nan astam medal jeńip aldy

Baspasóz qyzmetiniń málimetterine qaraǵanda, 80-nen astam respýblıkalyq zııatkerlik jarysqa 1,6 mln-ǵa jýyq oqýshy qatysty.

Halyqaralyq deńgeıde el namysyn 5 052 oqýshy qorǵady. Olar 37 olımpıada men ǵylymı konkýrsqa qatysyp, 1 026 medal jeńip aldy. Onyń ishinde 190 altyn, 332 kúmis jáne 504 qola medal bar. Taǵy 56 qatysýshy arnaıy marapattarǵa ıe boldy.

Matematıka baǵytyndaǵy jetistikterdi bólek atap ótken jón. Qazaqstan quramasy Vılnıýste ótken European Mathematical Olympiad jarysynda absolıýtti kóshbasshy atandy. Salonıkı qalasynda ótken Balkan Mathematical Olympiad jarysynda komanda myqty matematıkalyq mektepteri bar elder arasynda jalpykomandalyq esepte 6-oryn aldy. Qazaqstandyq oqýshylar Fınıkste ótken álemdegi eń iri ǵylymı-ınjenerlik kórme Regeneron ISEF-ke de qatysty. Qatysýshylardyń biri jasandy ıntellektini qoldaný arqyly onkologııalyq aýrýlardy erte anyqtaý jobasy úshin arnaıy marapat pen sheteldik ýnıversıtettiń bilim grantyn aldy. Hıýstonda ótken robototehnıka boıynsha halyqaralyq jarystarda qazaqstandyq oqýshylar 50 myńnan astam qatysýshy arasynda 12 nagradaǵa ıe boldy. Kúzdiń sońyna deıin el oqýshylary taǵy 10-nan astam halyqaralyq jarysqa qatysýdy josparlap otyr.

Memleket basshysy Qasym-Jomart Toqaevtyń tapsyrmasy boıynsha halyqaralyq olımpıadalar men ǵylymı konkýrstardyń jeńimpazdary men júldegerleri birjolǵy tólem alady. Altyn medal úshin 1500 aılyq eseptik kórsetkish, kúmis medal úshin 1000, qola medal úshin 500 aılyq eseptik kórsetkish qarastyrylǵan. Pedagog-jattyqtyrýshylar 8,5-ten 26,5-ke deıingi bazalyq laýazymdyq aılyqaqy kóleminde yntalandyrý tólemderin alady.

Eske salaıyq, 2025 jylǵy tamyzda Memleket basshysy olımpıada jeńimpazdarymen alǵash ret Aqordada kezdesti. Tamyz keńesi aıasynda ol olardyń tálimgerlerin de memlekettik nagradalarmen marapattady.

Osyǵan deıin qazaqstandyq oqýshylardyń halyqaralyq bıologııa olımpıadasynda alty medal jeńip alǵany týraly jazdyq.