Qazaqstandyq oqýshylar halyqaralyq olımpıadalarda 1000-nan astam júlde jeńip aldy
ASTANA. KAZINFORM – Qazaqstan halyqaralyq olımpıada jeńimpazdaryna memlekettik deńgeıde qoldaý kórsetetin elderdiń qataryna kiredi. 2022 jyldan bastap halyqaralyq pándik olımpıadalardyń jeńimpazdary men júldegerlerine, sondaı-aq olardy daıyndaǵan pedagogterge birjolǵy aqshalaı syıaqylar tólenip keledi.
Bul týraly QR Oqý-aǵartý vıtse-mınıstri Shynar Aqparova Ortalyq kommýnıkatsııalar qyzmetinde ótken brıfıngte málimdedi.
Vıtse-mınıstrdiń aıtýynsha, memlekettik qoldaý sharalary tek oqýshylarǵa ǵana emes, halyqaralyq olımpıadalardyń jeńimpazdary men júldegerlerin daıarlaǵan pedagogterge de kórsetiledi.
– 2025 jyly Memleket basshysy alǵash ret halyqaralyq olımpıada jeńimpazdaryn daıarlaǵan 24 pedagogke memlekettik nagradalar tabystady. Olar «Qurmet» ordenimen, «Shapaǵat» jáne «Eren eńbegi úshin» medaldarymen marapattaldy. Sonymen qatar tálimgerlerge 8,5-ten 26,5 laýazymdyq jalaqyǵa deıingi mólsherde aqshalaı syıaqylar berildi. 2025 jyly halyqaralyq olımpıadalardyń jeńimpazdary men olardy daıarlaǵan pedagogterge jalpy somasy 101 mıllıon teńgeden astam birjolǵy memlekettik syıaqy tólendi, – dedi Shynar Aqparova.
Onyń málimetinshe, altyn medal ıegerlerine 1 500 AEK-ke deıin, kúmis medal ıegerlerine 1 000 AEK-ke deıin, al qola medal ıegerlerine 500 AEK-ke deıin birjolǵy syıaqy qarastyrylǵan.
– Halyqaralyq olımpıada jeńimpazdary elimizdiń joǵary oqý oryndaryna memlekettik bilim granty negizinde oqýǵa múmkindik aldy. Al 2025 jyldan bastap halyqaralyq olımpıada jeńimpazdaryna «Bolashaq» halyqaralyq stıpendııasy boıynsha bilim alý múmkindigi berildi, – dedi spıker.
Sonymen qatar Shynar Aqparova bıyldan bastap memlekettik qoldaý halyqaralyq ǵylymı jobalar men ǵylymı konkýrstardyń qatysýshylaryna da keńeıtildi. Endi mundaı halyqaralyq ǵylymı baıqaýlardyń jeńimpazdary men olardy daıyndaǵan pedagogterge de birjolǵy memlekettik aqshalaı syıaqy tóleý tetigi engizildi dep atap ótti.
Sondaı-aq qazaqstandyq oqýshylar matematıka, ınformatıka, fızıka, hımııa, bıologııa, geografııa jáne basqa da pánder boıynsha halyqaralyq olımpıadalarda joǵary nátıjeler kórsetýdi jalǵastyryp keledi.
– 2025-2026 oqý jylynda Qazaqstan oqýshylary 44 halyqaralyq olımpıada men ǵylymı konkýrsqa qatysyp, 1 059 medal jáne 57 arnaıy syılyq jeńip aldy. Ulttyq quramanyń qorjynynda 201 altyn, 351 kúmis jáne 507 qola medal bar. Bul kórsetkish 2023 jylmen salystyrǵanda marapattar sanynyń 96 paıyzǵa artqanyn kórsetedi, – dep tolyqtyrdy ol.
Bıyl qazaqstandyq oqýshylar álemdegi eń bedeldi jeti halyqaralyq pándik olımpıadanyń tórteýine qatysyp, olardyń árqaısysynda júldege ıe boldy. Qazirgi tańda ulttyq quramanyń enshisinde 19 medal bar. Onyń ishinde 6 altyn, 9 kúmis jáne 4 qola medal.
Qyrkúıek aıyna deıin ulttyq qurama taǵy úsh iri halyqaralyq olımpıadaǵa qatysady. Olar: geografııa boıynsha IGeO, ınformatıka boıynsha IOI jáne lıngvıstıka boıynsha IOL halyqaralyq olımpıadalary.
Buǵan deıin qazaqstandyq oqýshylar halyqaralyq jasandy ıntellekt olımpıadasynda 4 júlde alǵanyn jazǵanbyz.
