Qazaqstandyq oqýshylar halyqaralyq olımpıadada jeńiske jetti
ASTANA.KAZINFORM – 22-23 tamyz kúnderi Grekııanyń Ejelgi Olımpııa qalasynda, Halyqaralyq Olımpıada akademııasynyń (IOA) aýmaǵynda Ekonomıka páni boıynsha halyqaralyq olımpıadanyń – Economics Olympiad. 2025 fınaly ótti.
Bul bilim dodasynda qazaqstandyq mektep oqýshylary joǵary nátıje kórsetip, zor tabysqa qol jetkizdi.
Atalǵan olımpıadaǵa álemniń 28 elinen ulttyq irikteýlerden ótken 128 úzdik oqýshy qatysty. Fınalǵa ár elden ulttyq týrdyń bes jeńimpazynan quralǵan komandalar jınaldy.
Qazaqstan quramasy aıryqsha jetistikke jetip, tórt birdeı medal jeńip aldy:
Batyrhan Muhtarhan – altyn medal jáne barlyq qatysýshylar arasyndaǵy absolıýttik birinshi oryn;
Eljan Zamanbekov – kúmis medal;
Nurnanym Muhamedjan – kúmis medal;
Aıym Jubatqan – qola medal.
Batyrhan Muhtarhan AQSh, Kanada, Qytaı, Nıderlandy, Polsha, Chehııa, Grekııa, Taıvan jáne ózge de elderdiń ókilderin basyp ozyp, olımpıadanyń absolıýttik jeńimpazy atandy.
Olımpıada baǵdarlamasy ekonomıka jáne qarjy salalaryndaǵy teorııalyq jáne praktıkalyq tapsyrmalardan turdy. Qatysýshylardan tereń bilim men ony naqty jaǵdaıda qoldana bilý qabileti talap etildi.
Saıys Grekııadaǵy erekshe tarıhı oryn – Olımpııa qalasynda ótti. Olımpıada qatysýshylary tek jarysqa qatysyp qana qoımaı, kóne zaman eskertkishterin, sonyń ishinde ejelgi olımpıadalyq stadıondy tamashalady.
Qazaqstan quramasyn jeńisimen Qazaqstan Respýblıkasynyń Grek Respýblıkasyndaǵy Tótenshe jáne Ókiletti Elshisi Tımýr Sultanǵojın quttyqtap, oqýshylardyń joǵary deńgeıdegi daıyndyǵyn atap ótti. Sonymen qatar, ol bul jetistik Qazaqstannyń halyqaralyq arenadaǵy bedelin arttyra túsetinin aıtty.
Eske salaıyq, Prezıdent halyqaralyq pán olımpıadalary jeńimpazdary men júldegerlerin marapattaǵanyn jazǵanbyz.