Qazaqstandyq oqýshylar halyqaralyq olımpıadada tórt medal ıelendi
ASTANA. KAZINFORM — Álemniń 93 elinen 360-tan astam oqýshy qatysqan bul zııatkerlik dodada Qazaqstan ulttyq quramasyndaǵy tórt oqýshy tamasha nátıje kórsetti, dep habarlaıdy Oqý-aǵartý mınıstrligi.
— Oqýshylar arasyndaǵy eń bedeldi halyqaralyq pándik olımpıadalar bastaldy: IChO, IPhO, IMO, IBO, IGeO, IOL, IOІ. Bul maýsymdy Qazaqstan oqýshylary súıinshili jańalyqpen bastady. Halyqaralyq hımııa olımpıadasynda (International Chemistry Olympiad, IChO-2025) elimizdiń atynan qatysqan tórt oqýshynyń bári júldege ıe boldy, onyń ekeýi — altyn medal, — delingen habarlamada.
Olımpıada 5-14 shilde aralyǵynda Birikken Arab Ámirlikterinde ótti. Álemniń 93 elinen 360-tan astam oqýshy qatysqan bul zııatkerlik dodada Qazaqstan ulttyq quramasyndaǵy tórt oqýshy tamasha nátıje kórsetip, elimizdiń jas hımıkteriniń kóshbasshylyq mártebesin taǵy bir márte dáleldedi.
- Kırıll Kım — Astana qalasyndaǵy Nazarbaev Zııatkerlik mektebiniń 12-synyp oqýshysy;
- Abylaı Kabdýlhadyr — Astana qalasyndaǵy Nazarbaev Zııatkerlik mektebiniń 12-synyp oqýshysy;
- Eńlik Baqytbekova — Almaty qalasyndaǵy Nazarbaev Zııatkerlik mektebiniń 12-synyp oqýshysy;
- Ańsar Jaqsylyqov — Aqtóbe oblysyndaǵy «Bilim-ınnovatsııa» lıtseıiniń 10-synyp oqýshysy.
Ulttyq quramaǵa ǵylymı jetekshilik etken: Sanjar Begdaır — Korea Advanced Institute of Science and Technology (KAIST) magıstranty, halyqaralyq jáne respýblıkalyq olımpıadalardyń jeńimpazy; Rınat Ilıýsızov — birneshe márte halyqaralyq jáne respýblıkalyq olımpıada jeńimpazy.
Oqý-aǵartý mınıstri Ǵanı Beısembaev bizdiń oqýshylarymyzdyń jetistigi — qazaqstandyq bilimdiń álemdegi bıik mártebesin taǵy bir márte dáleldegenin atap ótti.
— Bul jeńis — jas býynnyń jarqyn bolashaǵyna jol ashatyn berik negiz dep senemin. Jetistikterińiz eselene bersin, alar asýlaryńyz bıik bolsyn! Elimizdiń damýyna úles qosatyn bilimdi de talapty azamat bolyp ósýlerińizge tilektespin, — dep jazdy mınıstr óziniń resmı paraqshasynda.
Aıta keteıik, QR Oqý-aǵartý mınıstrligine qarasty «Daryn» respýblıkalyq ǵylymı-praktıkalyq ortalyǵynyń qoldaýymen, ulttyq qurama birqatar halyqaralyq oqý-jattyǵý jıyndaryna qatysyp, bıylǵy oqý jylynda eýropalyq jáne halyqaralyq olımpıadalarda 100% nátıje kórsetip úlgerdi.
Buǵan deıin qazaqstandyq oqýshylar Halyqaralyq fızıka olımpıadasynda 1-oryn aldy.