Qazaqstandyq oqýshylar Halyqaralyq fızıka olımpıadasynda 1-oryn aldy
ASTANA. KAZINFORM – Reseıdiń Hanty-Mansıısk qalasynda Halyqaralyq ǵylymı fızıka olımpıadasy (ISPhO-2025) máresine jetti. Bilim báıgesinde Qazaqstan quramasy jalpykomandalyq esepte 1-oryndy ıelenip, álemdik kóshbasshylar qataryna endi.
Oqý-aǵartý mınıstrligi málimetinshe, álemniń 21 elinen kelgen qatysýshylar arasynda 5 jas qazaqstandyq elge on marapatpen oraldy.
Olımpıada eki negizgi kezeńnen turdy: teorııalyq jáne eksperımenttik kezeń. Ár qatysýshy jeke esepte eki baǵyt boıynsha baǵalandy.
Jarys qorytyndysy boıynsha Almaty qalasy «Mıras» mektebiniń 11-synyp oqýshysy Roman Cheremnov, Qostanaı oblystyq «Bilim-ınnovatsııa» lıtseıiniń 10-synyp oqýshysy Taır Ábdiqadyr, Astana qalasyndaǵy RFMM-niń 11-synyp oqýshysy Altaır Akanov, Almaty qalasyndaǵy RFMM-niń 10-synyp oqýshysy Ilııas Qazymbek kúmispen kúpteldi. Sondaı-aq Astana qalasy «NURORDA» mektep-lıtseıiniń 11 synyp oqýshysy Danıel Tıýlıýbaev qola júldege qol jetkizdi.
Teorııalyq aınalym nátıjeleri boıynsha 1-dárejeli dıplommen Roman Cheremnov pen Ilııas Qazymbek; 2-dárejeli dıplommen Danıel Tıýlıýbaev, Taır Ábdiqadyr jáne Altaır Akanov marapattaldy.
Aıta keteıik, oqýshylarǵa Samat Maksýtov (PhD doktor) pen Nazaralı Aıtjanov (CDU dotsenti) jetekshilik etti.
Buǵan deıin qazaqstandyq oqýshylardyń Lıtvadaǵy Eýropa olımpıadasynda 7 medal jeńip alǵanyn jazǵan edik.