Qazaqstandyq oqýshylar halyqaralyq ekonomıka olımpıadasynda bes medal jeńip aldy
ASTANA. KAZINFORM – Qytaı Halyq Respýblıkasynyń Sýchjoý qalasynda 12-20 shilde aralyǵynda ótken ekonomıkadan halyqaralyq olımpıadada (International Economics Olympiad, IEO 2026) qazaqstandyq oqýshylar joǵary nátıje kórsetti.
Álemniń 61 elinen 300-ge jýyq daryndy oqýshy qatysqan bedeldi bilim dodasynda Qazaqstan quramasy bir altyn, úsh kúmis jáne bir qola medal jeńip aldy.
Qazaqstan quramasynyń qorjynyna bir altyn, úsh kúmis jáne bir qola medal tústi:
Muhtarhan Batyrhan — Astana qalasy Nura aýdanyndaǵy NIS-tiń 11-synyp oqýshysy, altyn medal jeńip alyp, halyqaralyq ekonomıka olımpıadasynyń eki dúrkin altyn júldegeri atandy.
Kemelov Dınmýhammed — Almaty qalasy Medeý aýdanyndaǵy NIS-tiń 11-synyp oqýshysy, kúmis medal.
Japarov Altaır — Almaty qalasy Medeý aýdanyndaǵy NIS-tiń 11-synyp oqýshysy, kúmis medal.
Sultanbek Arýjan — Almaty qalasyndaǵy «Mıras» halyqaralyq mektebiniń 11-synyp oqýshysy, kúmis medal.
Qýanyshbek Temirlan — Almaty qalasy Medeý aýdanyndaǵy NIS-tiń 10-synyp oqýshysy, qola medal.
Ulttyq quramany «Teenvestor» mektebiniń dırektory, ulttyq qurama jattyqtyrýshysy Rýslan Mýldashev jáne «Daryn» respýblıkalyq ǵylymı-praktıkalyq ortalyǵynyń ádiskeri Zere Jarlagapova daıyndady.
Qazaqstandyq oqýshylardyń bul jetistigi elimizde daryndy jastardy qoldaý jáne olardy halyqaralyq olımpıadalarǵa júıeli daıarlaý jumysynyń nátıjesin kórsetti. Álemniń 61 elinen jınalǵan úzdikter arasyndaǵy tabysty óner kórsetý qazaqstandyq oqýshylardyń ekonomıka, qarjy jáne bıznes baǵyttary boıynsha halyqaralyq deńgeıdegi básekege qabilettiligin taǵy bir márte dáleldedi.
Halyqaralyq ekonomıka olımpıadasy (International Economics Olympiad, IEO) — ekonomıka, qarjy jáne bıznes salasyndaǵy daryndy mektep oqýshylaryn biriktiretin álemdegi eń bedeldi zııatkerlik jarystardyń biri. Olımpıada barysynda qatysýshylardyń ekonomıka, qarjy jáne bıznes baǵyttary boıynsha bilimi, analıtıkalyq oılaý qabileti men praktıkalyq jaǵdaıda tıimdi sheshim qabyldaý daǵdylary baǵalanady.
Aıta ketelik Qazaqstan quramasy Halyqaralyq bıologııa olımpıadasynda tórt medal jeńip alǵan edi.
