Qazaqstandyq oqýshylar halyqaralyq bilim báıgelerinde 1000-nan astam medal jeńip aldy

ASTANA.KAZINFORM – 2024-2025 oqý jylynda qazaqstandyq oqýshylar halyqaralyq bilim dodalarynda orasan jetistikke qol jetkizdi. Barlyǵy 1720 oqýshy 35 halyqaralyq olımpıada men ǵylymı baıqaýǵa qatysyp, 1006 medal ıelendi. Bul týraly QR Oqý-aǵartý mınıstrligi Orta bilim komıtetiniń tóraǵasy Qanybek Jumashev málim etti.

Komıtet tóraǵasynyń aıtýynsha, júldelerdiń jalpy sanynyń ishinde 193 – altyn medal, 349 – kúmis medal, 464 qola medal bar.

Osylaısha, árbir ekinshi qatysýshy elge keminde bir júldemen oralǵan.

Sonymen qatar salystyrmaly túrde alǵanda, 2024 jyly halyqaralyq olımpıadalarǵa 571 oqýshy qatysyp, 172 medal jeńip alǵan bolatyn. Al bıylǵy nátıje úsh eseden astam ósimdi kórsetip otyr. 

– Qazaqstandyq oqýshylar álem boıynsha eń bedeldi sanalatyn jeti olımpıadada 27 júlde jeńip aldy. Atap aıtqanda, oqýshylarymyz 4 altyn, 13 kúmis jáne 10 qola medal enshiledi. Bul – elimizdiń bilim berý júıesiniń damyp kele jatqanyn kórsetetin aıqyn dálel, – dedi Qanybek Jumashev.

Buǵan deıin eýropalyq olımpıadada qazaqstandyq oqýshylar tórt júlde ıelengenin jazǵanbyz.