Qazaqstandyq oqýshylar halyqaralyq bıologııa olımpıadasynda alty medal jeńip aldy
ASTANA. KAZINFORM — 2026 jylǵy 15-22 mamyr aralyǵynda Reseı Federatsııasynyń «Sırıýs» federaldy aýmaǵynda Open International Biology Olympiad (OIBO-2026) halyqaralyq ashyq bıologııa olımpıadasy ótti. Bul týraly Oqý-aǵartý mınıstrligi málim etti.
Bedeldi bilim dodasyna álemniń 17 elinen 100-den astam jas bıolog qatysty.
Qazaqstan quramasy olımpıadaǵa 6 oqýshymen qatysyp, nátıjesinde 2 altyn, 3 kúmis jáne 1 qola medal jeńip alyp, 100 paıyzdyq nátıje kórsetti.
Pavlodar oblysyndaǵy «Bilim-Innovatsııa» mamandandyrylǵan lıtseı-ınternatynyń 11-synyp oqýshysy Qaırken Ersultan men Almaty qalasy Medeý aýdanyndaǵy NIS-tiń 11-synyp oqýshysy Jeltova Sofıa altyn medal ıegelendi.
Al Pavlodar oblysyndaǵy «Bilim-Innovatsııa» mamandandyrylǵan lıtseı-ınternatynyń 10-synyp oqýshysy Bılıalov Nýralı men Shyǵys Qazaqstan oblysyndaǵy «Bilim-Innovatsııa» mamandandyrylǵan lıtseı-ınternatynyń 11-synyp oqýshysy Muqashev Daryn sondaı–aq Mańǵystaý oblysyndaǵy «Bilim-Innovatsııa» lıtseı-ınternatynyń 9-synyp oqýshysy Ádilǵalı Nurasyl kúmis medal aldy.
Qaraǵandy qalasyndaǵy NIS-tiń 10-synyp oqýshysy Mejenına Evgenııa qola medal qanjyǵalady.
Komanda jetekshisi — Dinmuhammed Ýrazbaev, respýblıkalyq jáne halyqaralyq olımpıadalardyń júldegeri, qazirgi ýaqytta «Astana Medical University» KeAQ-nyń 4-kýrs stýdenti.
OIBO olımpıadasy teorııalyq, praktıkalyq jáne komandalyq jobalyq týrlardan turdy. Qatysýshylar molekýlalyq bıologııa, genetıka, bıohımııa jáne fızıologııa baǵyttary boıynsha kúrdeli tapsyrmalar oryndap, botanıka, zoologııa jáne bıoınformatıka salalarynda zerthanalyq jumystar júrgizdi.
Olımpıada oqýshylardyń teorııalyq bilimin ǵana emes, zertteý júrgizý, aqparatty taldaý jáne pánaralyq baılanystardy qoldaný daǵdylaryn da baǵalaýǵa baǵyttaldy.
Aıta keteıik, jas fızıkter Koreıada ótetin bedeldi olımpıadada el namysyn qorǵaıdy.
