Qazaqstandyq oqýshylar Grekııada ótken halyqaralyq robototehnıka chempıonatynda júldeger atandy
ASTANA. KAZINFORM – Túrkistan oblysy Qazyǵurt aýylynyń Qazygurt komandasy Grekııada ótken Open International Championship 2026 halyqaralyq robototehnıka chempıonatynda júldeli orynǵa ıe boldy. Bul týraly Oqý-aǵartý mınıstrligi habarlady.
Jarysqa 56 eldiń jas ınjenerleri qatysty. Qazaqstandyq oqýshylar AQSh, Japonııa, Brazılııa, Germanııa, Qytaı, Ispanııa jáne Túrkııa qatysýshylarymen básekege tústi. Chempıonat qorytyndysy boıynsha olar Champions Award nomınatsııasynda ekinshi oryn ıelendi.
Quramada Baýyrjanqyzy Araılym, Abdraı Ernur, Jarkınbek Іnjý, Amangeldıev Abzal, Jetpis Erasyl, Ótepbergen Nurbek, Aıbek Erkebulan jáne Kenesov Dıas óner kórsetti. Olar Q.Tursynqulov atyndaǵy mektep-gımnazııada, Q.Sátbaev atyndaǵy mektep-lıtseıde jáne A.S.Makarenko atyndaǵy jalpy bilim beretin mektepte oqıdy.
Komandanyń jetekshileri: Orazhan Beksultan, Tastan Erbol, Ústenov Nursultan, Nyshan Qaıyrken jáne Alımkýlov Qýanysh.
Qazygurt komandasy halyqaralyq chempıonatqa joldamany Alem Tech Fest jarysynda jeńip alǵan bolatyn. Atalǵan jarys QR Oqý-aǵartý mınıstrliginiń qoldaýymen USTEM Foundation jáne «Daryn» respýblıkalyq ǵylymı-praktıkalyq ortalyǵynyń uıymdastyrýymen ótken bolatyn.
Komanda halyqaralyq dodaǵa shamamen bir jyl daıyndalyp, joǵary nátıje kórsetti.
Qazaqstandyq oqýshylar ekologııalyq máselelerdi sheshýge arnalǵan sýasty robotyn jasaǵanyn jazǵan edik.
