Qazaqstandyq oqýshylar Grekııada ótken halyqaralyq olımpıadada jeńiske jetti
ALMATY. KAZINFORM – Qazaqstan oqýshylary Grekııada uıymdastyrylǵan aǵylshyn tiliniń olımpıadasynda altyn jáne kúmis medal jeńdi. Bul týraly Qazaqstandaǵy KGL Contest olımpıadasynyń resmı úılestirýshisi EDU Stream habarlady.
Álemniń 39 elinen oqýshylar qatysqan aǵylshyn tiliniń KGL Contest-2026 halyqaralyq olımpıadasynyń A1 deńgeıi boıynsha fınalynda Erasyl Jıenǵalı baq synady. Almaty oblysynan barǵan oqýshy óz deńgeıinde úzdik bolyp, birinshi oryn aldy.
⁃ Bul jeńisten men ózime mańyzdy qorytyndy jasadym. Ózińe senip, sońyna deıin áreket etseń, eńbegiń mindetti túrde nátıjesin beredi. Men úshin bul — jaı ǵana medal emes, úlken tájirıbe boldy, - dedi Erasyl Jıenǵalı.
Al A2 deńgeıinde Astana qalasyndaǵy Nazarbaev zııatkerlik mektebiniń oqýshysy Adel Talǵat kúmis júlde jeńdi. Bilim saıysynyń qorytyndy kezeńine elimizden jalpy tórt oqýshy qatysqan.
Jalpy mektepke arnalǵan KGL Contest aǵylshyn tiliniń olımpıadasynda qazaqstandyq oqýshylar ekinshi ret saıysqa túsip otyr. Alǵash ret 2025 jyly qatysqan Almaty qalasynyń oqýshysy Darııa Nasımýllına B2 deńgeıi boıynsha birinshi oryn ıelengen bolatyn.
Eske salaıyq, elimizde aýyl mektebinen shyqqan respýblıkalyq olımpıada júldegeri 10 ese kóbeıdi.
