Qazaqstandyq oqýshylar Gonkongte robototehnıka jarysynda top jardy
ASTANA. KAZINFORM – Qazaqstandyq oqýshylar halyqaralyq FIRST LEGO League Hong Kong Championship 2026 chempıonatynda el namysyn abyroımen qorǵap, joǵary nátıjelerge qol jetkizdi.
Bıylǵy chempıonatqa álemniń 30-dan astam elinen 120 úzdik komanda, 900-den astam oqýshy qatysty. Halyqaralyq bilim berý jáne robototehnıka salasyndaǵy bedeldi alańdardyń birine aınalǵan jarysta Almaty qalasynan qatysqan eki komanda júldeli oryndarǵa ıe boldy.
PhysTech School Almaty mektebiniń «PEAK» komandasy chempıonattyń eń joǵary marapattarynyń biri – 1st Runner-Up ataǵyn jeńip aldy. Sonymen qatar komanda eń ınnovatsııalyq kórme aımaǵy úshin beriletin Most Innovative Booth Award arnaıy júldesimen marapattaldy. Robot Game sanatynda 6-oryn ıelenip, álemniń úzdik komandalarynyń qataryna endi.
Komanda quramynda Bektemırov Erasyl, Hegaı Vıktor, Orman Anýar, Pak Ilson, Haırýlla Aıken jáne Stıajkına Tamına boldy. Komandanyń jattyqtyrýshysy – Berikpol Maqsat Asqaruly.
Al «Future Axions 218» komandasy Invitational sanatynda 2nd Runner-Up nátıjesin kórsetip, halyqaralyq komandalar arasynda ekinshi orynǵa ıe boldy.
Komanda quramynda №218 keleshek mektebiniń oqýshylary Zamanbek Rınat pen Qalıasqar Іńkár, sondaı-aq №24 lıtseıdiń oqýshylary Tursyn Medına Sábıtqyzy men Tursynbek Ádııa Janbolatqyzy óner kórsetti. Komandanyń mentory – Qaraǵol Baqkeldi Begjanuly.
Qazaqstandyq oqýshylardyń halyqaralyq deńgeıdegi bul jetistigi elimizde STEM-bilim berý men robototehnıka baǵytyn damytý boıynsha júrgizilip jatqan júıeli jumystardyń nátıjesin kórsetedi. Búginde mektepterde robototehnıka kabınetteri ashylyp, ınjenerlik jáne tsıfrlyq daǵdylardy damytýǵa baǵyttalǵan bilim berý baǵdarlamalary keńinen engizilýde.
Oqýshylardyń halyqaralyq jarystardaǵy tabystary olardyń joǵary daıyndyq deńgeıin, shyǵarmashylyq jáne ınjenerlik oılaý qabiletterin aıqyndap, qazaqstandyq bilim berý júıesiniń áleýetin halyqaralyq deńgeıde tanytýǵa múmkindik beredi.
Aıta ketelik Qazaqstan álemdegi eń bedeldi olımpıadada bes altyn ıelengen edi.
