Qazaqstandyq oqýshylar FIDA dron-sokker boıynsha álem chempıonatyna qatysyp jatyr

ASTANA. KAZINFORM – 2025 jylǵy 25–28 qyrkúıek aralyǵynda Chondjý qalasynda (Ońtústik Koreıa) tarıhtaǵy alǵashqy FIDA dron-sokker álem chempıonaty ótip jatyr. Bul týraly Oqý-aǵartý mınıstrliginiń baspasóz qyzmeti habarlady. 

Baıqaýǵa álemniń 30 elinen 100-den astam komanda qatysyp jatyr.

Alǵash ret Qazaqstan óz ulttyq delegatsııasyn usyndy. Onyń quramyna elordadan úsh komanda kirdi:

• №82 «Daryn» mamandandyrylǵan lıtseıi,
• №8 mektep-lıtseıi,
• SKILLSET mektebi.

Jalpy chempıonatqa Qazaqstannan 30-dan astam qatysýshy jol tartty.

Drone Soccer – zamanaýı sport túri, ol dron tehnologııalaryn, jasandy ıntellekt elementterin, ınjenerlik shyǵarmashylyqty jáne komandalyq jumysty ushtastyrady.

Qazaqstandyq oqýshylardyń álemdik chempıonatqa qatysýy – STEM-bilim men jasandy ıntellekt quzyretterin damytýǵa, sondaı-aq jastar arasynda jańa tehnologııalardy keńinen nasıhattaýǵa jasalǵan mańyzdy qadam. 

Aıta ketelik elimizdiń úzdik pedagogi 4 mln teńge syıaqy alatyny týraly jazǵan edik.