Qazaqstandyq oqýshylar Eýropany baǵyndyrdy: 9 qatysýshynyń bári júldeger atandy
ASTANA. KAZINFORM — Qazaqstandyq oqýshylar Eýropalyq geografııa olımpıadasynda tarıhı nátıjege qol jetkizdi, dep habarlaıdy Oqý-aǵartý mınıstrliginiń baspasóz qyzmeti.
2026 jylǵy 27 maýsym men 3 shilde aralyǵynda Bolgarııanyń Varna qalasynda ótken Eýropalyq geografııa olımpıadasyna (European Geography Olympiad, EGeo) 13 memleketten 100 oqýshy qatysty.
Jarys qorytyndysy boıynsha Qazaqstannyń 9 oqýshydan quralǵan ulttyq quramasy 2 altyn, 5 kúmis jáne 2 qola medal jeńip alyp, komandanyń barlyq múshesi júldeger atandy. Bul — Qazaqstannyń Eýropalyq geografııa olımpıadasyna qatysý tarıhyndaǵy eń úzdik nátıje.
Olımpıada barysynda qatysýshylar fızıkalyq, áleýmettik-ekonomıkalyq jáne aımaqtyq geografııa boıynsha teorııalyq jáne praktıkalyq tapsyrmalardy oryndap, kartografııalyq materıaldar men geografııalyq derekterdi taldaý daǵdylaryn kórsetti.
Altyn medal ıegerleri:
Andreı Enbahtov — Qostanaı qalasyndaǵy jaratylystaný-matematıka baǵytyndaǵy NIS-tiń 11-synyp oqýshysy;
Syrym Amantaı — Qaraǵandy oblysyndaǵy N. Nurmaqov atyndaǵy mamandandyrylǵan mektep-lıtseı-ınternatynyń 9-synyp oqýshysy.
Kúmis medal ıegerleri:
Daryn Bekbol — Jetisý oblysy, Taldyqorǵan qalasyndaǵy Muhtar Aryn atyndaǵy № 24 mamandandyrylǵan lıtseıdiń 10-synyp oqýshysy;
Azamat Jýmajanov — Aqtóbe oblystyq «Bilim-ınnovatsııa» lıtseı-ınternatynyń 9-synyp oqýshysy;
Aıdos Serikbaı — Almaty oblysy, Esik qalasyndaǵy A. Málkeev atyndaǵy «Bilim-ınnovatsııa» lıtseı-ınternatynyń 11-synyp oqýshysy;
Shynǵys Múrsálim — Pavlodar qalasyndaǵy jaratylystaný-matematıka baǵytyndaǵy NIS-tiń 11-synyp oqýshysy;
Nuraı Bakeeva — Soltústik Qazaqstan oblystyq «Bilim-ınnovatsııa» lıtseı-ınternatynyń 11-synyp oqýshysy.
Qola medal ıegerleri:
Amır Darynov — Shyǵys Qazaqstan oblystyq «Bilim-ınnovatsııa» lıtseıiniń 11-synyp oqýshysy;
Alan Kozlenko — Shyǵys Qazaqstan oblystyq «Bilim-ınnovatsııa» lıtseıiniń 11-synyp oqýshysy.
Ulttyq quramany jarysqa geografııa pániniń muǵalimi Nurmaǵambet Danat Muratuly (IQanat High School of Burabay) men «Daryn» respýblıkalyq ǵylymı-praktıkalyq ortalyǵynyń ádiskeri Shaıhına Oral Bekbolatqyzy daıyndap, jetekshilik etti.
Eske salaıyq, buǵan deıin qazaqstandyq jas matematıkter Balqan olımpıadasynda álemniń úzdik bestigine engen edi.
