Qazaqstandyq oqýshylar Eýropalyq fızıka olımpıadasynda 4 medal jeńip aldy
ASTANA. KAZINFORM - Shvetsııa Koroldiginiń Geteborg qalasynda 10-shy Eýropalyq fızıka olımpıadasy (European Physics Olympiad, EuPhO 2026) óz máresine jetti, dep habarlaıdy QR Oqý-aǵartý mınıstrliginiń baspasóz qyzmeti.
Bedeldi halyqaralyq bilim dodasyna álemniń 41 elinen 200-den astam oqýshy qatysty.
Qazaqstan Respýblıkasynyń ulttyq quramasy joǵary nátıje kórsetip, 3 kúmis jáne 1 qola medal ıelendi.
Kúmis medal ıegerleri:
• Seıtqamıt Arǵyn – Astana qalasy Nura aýdanyndaǵy jaratylystaný-matematıka baǵyttaǵy NIS-tiń 11-synyp oqýshysy;
• Ábdiqadyr Taır – Qostanaı oblystyq daryndy balalarǵa arnalǵan «Bilim-ınnovatsııa» lıtseı-ınternatynyń 11-synyp oqýshysy;
• Sabyrov Mergen – Astana qalasyndaǵy NURORDA mektebiniń 10-synyp oqýshysy.
Qola medal ıegeri:
• Jolaman Abylaıhan – Almaty qalasyndaǵy NURORDA mektebiniń 10-synyp oqýshysy.
Ulttyq quramanyń halyqaralyq olımpıadaǵa qatysýyn Ál-Farabı atyndaǵy Qazaq ulttyq ýnıversıtetiniń aǵa oqytýshysy Bekmyrza Beısenov pen halyqaralyq olımpıadalardyń júldegeri Temirlan Ismaǵulov úılestirdi.
-Eýropalyq fızıka olımpıadasy – fızıka páni boıynsha daryndy oqýshylardyń teorııalyq bilimi men eksperımenttik daǵdylaryn baǵalaıtyn bedeldi halyqaralyq jarystardyń biri. Qazaqstandyq oqýshylardyń kezekti jetistigi elimizdiń halyqaralyq bilim keńistigindegi bedelin arttyryp, jas fızıkterdiń joǵary daıyndyq deńgeıin kórsetti,-delingen habarlamada.
Osyǵan deıin qazaqstandyq oqýshylardyń Eýropalyq fızıka olımpıadasynda el namysyn qorǵaıtyny týraly jazǵan edik.
