Qazaqstandyq oqýshylar dron-fýtboldan alǵash ret álem chempıonatyna qatysady
Chempıonat dron-sport astanasy sanalatyn Ońtústik Koreıanyń Chondjý qalasynda 2025 jyly qyrkúıek aıynyń sońynda ótedi.
Sapardy Kazakhstan Drone Soccer Association uıymy TsDIAÓM qoldaýymen, Astana qalasy ákimdiginiń «Astana daryny» daryndy balalar men talantty jastardy anyqtaý jáne qoldaý ortalyǵy» MKQK-men birlesip uıymdastyryp otyr.
Bolashaq arenasy
Jarys 25–28 qyrkúıek aralyǵynda Chondjý qalasyndaǵy eki alańda (Jeonju International Drone Sports Center jáne Jeonju World Cup Stadium) ótedi.
Arena ishindegi kórinis ǵylymı fantastıkadaǵy fýtýrıstik sportty eske túsiredi: tormen jabdyqtalǵan alań, áýen, jarqyraǵan projektorlar, kometa sekildi jarqyrap ushyp júrgen ondaǵan fýtbol drondary. Trıbýnalarda — mektep oqýshylary, ınjenerler jáne tehnologııa jankúıerleri. Atmosfera klassıkalyq sport emes, kıbersportqa nemese K-pop kontsertine kóbirek uqsaıdy.
Dron-fýtbol degenimiz ne?
Bul — halyqaralyq sport túri. 5 adamnan turatyn 2 komanda matchty tormen jabylǵan stadıonda oınaıdy. Ár komandanyń mindeti qarsylastyń qaqpasyna (aýada ilýli turǵan saqına) múmkindiginshe kóp gol soǵý. Oıynǵa arnalǵan drondar soqtyǵysýdan qorǵaý úshin arnaıy ekzoskeletpen jabdyqtalǵan.
Match 3 raýndtan turady. Drondar soqtyǵysady, kúrt manevr jasaıdy, qorǵanady jáne shabýyldaıdy. Trıbýnalarda jankúıerlerdiń daýysy estiledi, al atmosfera kıbersportty, basketbol nemese fýtýrıstik shoýdy eske túsiredi.
Qaýipsizdik máselesi de nazardan tys qalmaıdy: dron tek arena ishinde ushady, tóreshilerdiń qadaǵalaýymen jáne erejelerdi qatań saqtaı otyryp júrgiziledi.
Qazaqstandy kimder tanystyrady?
Álem chempıonatyna elordadan úsh komanda qatysady:
- № 82 «Daryn» mamandandyrylǵan lıtseıi
- № 8 mektep-lıtseıi
- Skillset jeke menshik mektebi
Nelikten mańyzdy
Ońtústik Koreıada dron-fýtbol nebári birneshe jyldyń ishinde mekteptik bastamadan aýqymdy qozǵalysqa aınaldy: búginde munda 1000-nan astam mektep jáne ýnıversıtet komandalary oınaıdy, al FIDA Federatsııasy 35-ten astam eldi biriktiredi. Chondjýdaǵy álem chempıonatyna ondaǵan ulttyq qurama men júzdegen sportshy qatysady dep kútilip otyr.
Qazaqstan úshin bul — debıýt ári sımvoldyq qadam: alǵash ret astanalyq mektep komandalary AQSh, Frantsııa, Qytaı jáne Koreıa Respýblıkasynyń sportshylarymen qatar alańǵa shyǵady.
- Tehnologııa jáne bilim berý. Oqýshylar drondardy basqarýdy ǵana emes, elektronıkamen jumys isteýdi, baǵdarlamalaýdy, taktıkalyq oılaýdy jáne birtutas komanda bolyp áreket etýdi úırenedi.
- Elorda ımıdji. Astana tehnologııalyq sport kartasyna shyǵyp, halyqaralyq jańa formattaǵy jarystarǵa qatysatyn alań retinde óz ornyn aıqyndap otyr.
— Balalar úshin bul jaı ǵana týrnır emes, bolashaqqa beriletin bılet. Búgin olar drondardy basqaryp, jumys prıntsıpterin úırenýde. Erteń ushqyshsyz apparattardy jobalaıtyn bolady. Bul Qazaqstanda ǵana emes, búkil álemdegi avıatsııany túbegeıli ózgertýi múmkin. Prezıdent atap ótkendeı, ushqyshsyz tehnologııalar — strategııalyq basymdyq. Ol halyqaralyq jarystarǵa qatysatyn osyndaı mektep komandalarynan bastalatynyn kórsetip otyrmyz, — dedi Kazakhstan Drone Soccer Association uıymynyń jetekshisi Dmıtrıı Ivanov.
Elge oralǵan soń
Kúzde komandalar Astanada ótetin Digital Bridge 2025 kórmesiniń qurmetti qonaǵy bolady. Halyqaralyq qonaqtarǵa sheberlik sabaqtaryn ótkizip, dron-fýtboldan kórsetilimdik matchtarǵa qatysady.
Uıymdastyrýshylardyń paıymdaýynsha, bul jarys 2025-2026 maýsymyn ashyp, turaqty mektepterdegi jattyǵýlar men qalalyq lıgalardyń bastamasy bolady.
Buǵan deıin, astanalyq oqýshyǵa alǵash ret «QR eńbek sińirgen sport sheberi» ataǵy berildi.