Qazaqstandyq oqýshylar Beıjińdegi robototehnıka chempıonatynda kúmis júlde jeńip aldy

«2026 FIRST® LEGO® League Asia Open Championship» aýqymdy jarysyna álemniń 25 eli men óńirinen 375 komanda qatysty. Qazaqstan atynan Astana, Almaty qalalarynan, Aqmola, Qaraǵandy, Qyzylorda oblystarynan jáne Abaı oblysynan 20-ǵa jýyq komanda baq synady.

Chempıonattyń kúmis júldesin semeılik «SBIL•LION•AIRES» komandasy jeńip aldy. 2024 jyly «Sapa Semey Alumni» túlekter qaýymdastyǵynyń qoldaýymen qurylǵan joba buǵan deıin Sıngapýrda ótken jarysta ekinshi oryn alǵan.

Komanda múshesi Nursultan Orazalınniń aıtýynsha, Beıjińdegi júldeli oryn otandyq robototehnıka úshin úlken jetistik boldy. Qazirgi tehnologııalar dáýirinde robototehnıka — qarqyndy damyp kele jatqan salalardyń biri.

— Bıyl biz óte sátti óner kórsettik. Aldyńǵy kezeńderde jınaǵan tájirıbemiz aýyzbirshiligimizdi nyǵaıtyp, komandalyq ózara is-qımyl daǵdylarymyzdy jetildirýge kómektesti. Pekındegi chempıonatta úılesimdi áreketimizdiń arqasynda tuǵyrdyń ekinshi satysyna kóterile aldyq, — dedi Nursultan.

Jarystyń baǵdarlamasy týraly komandanyń taǵy bir múshesi Álıhan Muratov aıtyp berdi.

— Aldymyzda tórt negizgi mindet turdy: robottyń kartadaǵy tapsyrmalardy oryndaýy, ınjenerlik-konstrýktorlyq sheshimdi qorǵaý, arheologtarǵa kómektesýge arnalǵan ınnovatsııalyq startapty tanystyrý, sondaı-aq komandalyq jumystyń úılesimdiligin kórsetý. Sonymen qatar Brazılııa, Ulybrıtanııa jáne Japonııadan kelgen oqýshylarmen belsendi qarym-qatynas jasap, bir-birimizge qoldaý kórsettik, — dep túsindirdi Álıhan.

Komanda múshesi Zakarııa Iklasov elimizdegi robototehnıkanyń qarqyndy damyp kele jatqanyn atap ótti. Onyń aıtýynsha, halyqaralyq chempıonattar jas ınjenerlerge kásibı turǵyda ósýge múmkindik beredi. Sonymen qatar bul Qazaqstannyń joǵary tehnologııalar salasyndaǵy pozıtsııasyn nyǵaıtyp, tehnologııalyq progresti jedeldetýge jol ashady.

Chempıonattaǵy óner kórsetý qorytyndysyn shyǵara otyryp, komanda múshesi Janarys Ardahov týrnırdiń komandalyq rýhty shyńdap, kúrdeli jaǵdaılarda ortaq sheshim tabýǵa úıretkenin aıtty. Ol barlyq qatysýshylar atynan ata-analaryna jáne «Sapa Semey Alumni» túlekter qaýymdastyǵyna jan-jaqty qoldaý kórsetkeni úshin shynaıy alǵysyn bildirdi.

Jarystan keıin Pekındegi Qazaqstannyń mádenı ortalyǵy jas otandastarymyzǵa arnaıy qabyldaý uıymdastyrdy. Qazaqstannyń Qytaıdaǵy elshisiniń atynan elshilik keńesshisi Qaıyrjan Ermanov oqýshylardy halyqaralyq chempıonattaǵy sátti óner kórsetýimen quttyqtap, ǵylym, tehnologııa jáne ınjenerııa salalarynda odan ári tabys tiledi.

— Mundaı halyqaralyq jarystarǵa qatysý qazaqstandyq jastardyń bilimi men daǵdylaryn damytýǵa, tájirıbe almasýǵa jáne Qazaqstannyń zııatkerlik áleýetin halyqaralyq deńgeıde ilgeriletýge yqpal etedi, — dep atap ótti qazaqstandyq dıplomat.

Buǵan deıin Qazaqstandyq oqýshy álemdegi úzdik bes jas baǵdarlamashynyń qataryna engeni týraly jazǵan edik.