Qazaqstandyq oqýshylar Barselonadaǵy baıqaýda 13 medal enshiledi

ASTANA. KAZINFORM — Qazaqstandyq oqýshylar Barselonada ótken International STEM Olympiad baıqaýynda 13 medal jeńip aldy, dep habarlaıdy elorda ákimdiginiń resmı saıty.

Barselona qalasynda ótken International STEM Olympiad baıqaýynyń fınalynda qazaqstandyq oqýshylar tarıhı jetistikke qol jetkizdi. Alǵash ret elimizdiń segiz oqýshysy bedeldi halyqaralyq baıqaýdyń grand-fınalyna ótip, túrli atalymdar boıynsha júldeli oryndardy ıelendi.

STEM baǵytyndaǵy bul olımpıadaǵa álemniń 35 elinen, onyń ishinde AQSh, Saýd Arabııasy, Túrkııa, Ulybrıtanııa, Shveıtsarııa jáne basqa da memleketterden 800-den astam oqýshy qatysty. Baıqaý bes baǵyt boıynsha uıymdastyryldy: kodtaý, matematıka, jaratylystaný jáne tehnologııa, jasandy ıntellekt (AI Challenge) jáne kórkem-jarnamalyq fılm.

Qazaqstan atynan Astana, Almaty jáne Pavlodar qalalarynan qatysqan oqýshylar kelesi nátıjelerge qol jetkizdi:

• Nurasyl Rysqulbekov «Jaratylystaný» sanatynda aldyn ala kezeńde úzdik 30 qatysýshy qataryna kirip, fınalda «Kodtaý» sanatynan 1-oryn (altyn medal) jeńip aldy.
• Arman Áýbákir — «Matematıka» sanatynda 1-oryn (altyn medal) ıegeri.
• Jánibek Nurhamıtuly, Arman Áýbákir jáne Bıjan Ashyıahatov — «Kodtaý» sanatynda 2-oryn (kúmis medal).
• Álıhan Tanat pen Nurasyl Rysqulbekov — «Kodtaý» sanatynda 3-oryn (qola medal).
• Aısha Temirhan — «Jaratylystaný» sanatynda 2-oryn (kúmis medal).
• Jánibek Nurhamıtuly men Nurmuhambet Laǵylaı — «Matematıka» sanatynda 2-oryn (kúmis medal).
• Álıhan Tańat, Madına Erjanqyzy jáne Nurasyl Rysqulbekov — «Matematıka» sanatynda 3-oryn (qola medal).

Jalpy esepte Qazaqstan quramasy 2 altyn, 6 kúmis jáne 5 qola medal jeńip aldy.

Bul qatysýshylar byltyr Astanada ótken irikteý kezeńinde anyqtalǵan bolatyn. 2024 jyly elimizdiń astanasynda ótken halyqaralyq STEM olımpıadasyna Qazaqstan, Qyrǵyzstan, Reseı jáne Tájikstan elderinen 78 komanda quramynda 200-den astam oqýshy qatysty. Olımpıada Astana qalasy ákimdiginiń, «Astana Innovations» AQ-nyń qoldaýymen ótti.

Uıymdastyrýshylar qatarynda «Daryn» Respýblıkalyq ǵylymı-praktıkalyq ortalyǵy, Astana qalasynyń Bilim basqarmasy jáne «STEM Academia» JShS boldy. Іrikteý nátıjesi boıynsha Pavlodar, Astana jáne Almaty qalalarynan 8 úzdik oqýshy tańdalyp, Barselonada Qazaqstan atynan alǵash ret fınalǵa qatysty.

— Toǵyz jyl buryn biz alǵash uıymdastyrǵan olımpıadaǵa nebári 20 oqýshy qatysqan edi. Búginde qatysýǵa 2000-nan astam ótinim túsedi. STEM olımpıadasyn biz jergilikti ákimdiktermen, Astana Innovations jáne «Astana daryny» ortalyǵymen birlese ótkizemiz. Qýantarlyǵy — bul bastama naqty nátıje berip jatyr: Qazaqstanda ǵylym men tehnologııaǵa yntaly jańa býyn ósip keledi. Olardyń búgingi nátıjesi — sonyń aıǵaǵy. Biz olımpıada jeńimpazdarynyń Barselonada óz bilimin laıyqty deńgeıde kórsetkenine maqtanamyz, — dedi STEM Academia dırektory Zalqarbek Muratalıuly.

Buǵan deıin qazaqstandyq oqýshylar Birikken Arab Ámirlikterinde ótken halyqaralyq olımpıadada tórt medal ıelendi.