Qazaqstandyq oqýshylar Bakýdegi halyqaralyq olımpıadada júldeli oryndarǵa ıe boldy
ASTANA. KAZINFORM — Bakýde ótken halyqaralyq STEM jobalyq olımpıadasy qazaqstandyq oqýshylardyń jeńisimen aıaqtaldy, dep habarlaıdy Kazinform agenttiginiń Ázerbaıjandaǵy tilshisi Kavkaz jáne Ortalyq Azııa Halyqaralyq bakalavrıat mektepteriniń qaýymdastyǵyna (CCAAIBWS) silteme jasap.
Oqýshylar ınjenerııa, tehnologııa jáne ekologııa (STEM) pánderi boıynsha joǵary kórsetkishter kórsetti. Usynylǵan jeti jobanyń árqaısysy marapatqa ıe boldy. Qazaqstandyq komanda bir altyn, úsh kúmis jáne úsh qola medal jeńip aldy.
Bastaýysh synyp oqýshylary ázirlegen «Bolashaqtyń kıiz úıi» jobasy (PYP baǵdarlamasy) Ulybrıtanııadan kelgen sarapshylardan turatyn halyqaralyq qazylar alqasynyń erekshe qyzyǵýshylyǵyn týdyrdy. Jas zertteýshiler zamanaýı qalalyq jaǵdaılarǵa beıimdelgen dástúrli qazaq úıiniń joǵary tehnologııalyq nusqasyn usyndy. Jobaǵa robottandyrylǵan basqarý júıesi, transformatsııalanatyn jıhaz jáne aýa raıy sensorlarymen jáne kiriktirilgen teleskoppen jabdyqtalǵan aqyldy shańyraq kiredi.
Delegatsııamen birge kelgen Nurgúl Saparova balalardyń áleýetin damytý úshin mundaı bastamalardyń mańyzdylyǵyn atap ótti.
— Negizgi ıdeıa balalardy Qazaqstandaǵy naqty máseleler týraly oılaýǵa jáne óz sheshimderin usynýǵa jeteleý. Bizdiń oqýshylarymyz óz ıdeıalaryn daıyndap, usyndy. Mundaı halyqaralyq baıqaýlar bastaýysh synyp oqýshylary úshin sırek kezdesedi, sondyqtan bul balalar úshin óte mańyzdy jáne qyzyqty tájirıbe boldy, — dep atap ótti ol.
Sonymen qatar, muǵalim joba erekshelikterimen bólisti.
— Biz qalalyq ortada qoldanýǵa bolatyn jańartylǵan kıiz úı ıdeıasyn usyndyq. Balalar transformatsııalanatyn jıhaz ben shańyraq úshin zamanaýı tehnologııalyq sheshim — jańbyr jaýǵanda jabylatyn jáne kún shyqqanda ashylatyn avtomatty júıe jasady. Úıdiń dástúrli elementi bilim berý quralyna aınaldy, — dep atap ótti muǵalim.
Bıylǵy is-sharaǵa aımaqtaǵy birneshe jetekshi bilim berý mekemeleriniń ókilderi qatysty. Ony ártúrli elderdiń 42 mektebin biriktiretin halyqaralyq bilim berý jelisi — CCAAIBWS qaýymdastyǵy uıymdastyrdy. Bıyl Ázerbaıjanda besinshi jáne halyqaralyq formatta úshinshi olımpıada ótti.
Uıymdastyrýshylardyń aıtýynsha, CCAAIBWS olımpıadasy jas urpaqtyń ınnovatsııalyq oılaý daǵdylaryn damytýǵa baǵyttalǵan. Baký jeńimpazdary óz jobalaryn Italııadaǵy jahandyq fınalda usyný quqyǵyna ıe boldy.
Buǵan deıin Astanada STEM-olımpıadasyna 7 elden 250-den asa adam qatysqan edi.
