Qazaqstandyq oqýshylar Almatydaǵy olımpıadada 132 medal jeńip aldy
ALMATY. KAZINFORM – Almatyda 10-15 qańtar aralyǵynda XXII Halyqaralyq Jáýtikov olımpıadasy ótti. Іs-sharaǵa QR Oqý-aǵartý mınıstri Juldyz Súleımenova qatysyp, jeńimpaz oqýshylardy marapattady.
Bıyl olımpıadaǵa matematıka, fızıka jáne ınformatıka pánderinen barlyǵy 612 oqýshy men 122 komanda jetekshisi qatysty. Saıyskerler álemniń 16 elinen jınaldy. Olardyń arasynda Armenııa, Ázerbaıjan, Belarýs, Bolgarııa, Grýzııa, Qazaqstan, Qyrǵyzstan, Mońǵolııa, Pákistan, Reseı, Rýmynııa, Tájikstan, Túrkmenstan, Indonezııa, Úndistan jáne Ózbekstannan kelgen oqýshylar bar.
Olımpıada eki týrdan turdy. Tapsyrmalar mamandandyrylǵan synyptar baǵdarlamasyna sáıkestendirildi jáne olardy halyqaralyq qazylar alqasy qurastyrdy. Qazylar alqasynyń quramynda halyqaralyq deńgeıde moıyndalǵan mamandar bar, al tóraǵasy – QR UǴA akademıgi Asqar Jumadildaev.
– Memleket basshysy Qasym-Jomart Toqaev jýyrda Qazaqstan úshin tehnıkalyq ıntellegentsııany qurylymdaý óte mańyzdy, tipti strategııalyq qajettilik degen bolatyn. Al tehnıkalyq ıntellegentsııa – ınnovatsııalardyń, jańa tehnologııalardyń jáne ónimdiliktiń draıveri bola alady. Sizder bilim saıysynda matematıka, fızıka jáne ınformatıka pánderinen tereń bilimderińizdi kórsetip, logıkalyq jáne shyǵarmashylyq oılaý qabiletterińizdi shyńdadyńyzdar. Kóptiń arasynan sýyrylyp alǵa shyqtyńyzdar. Sizder – elimizdiń keleshek tehnıkalyq ıntellegentsııasynyń negizin quraıtyn maqtanyshysyzdar. Búgingi alǵan júldelerińiz – Qazaqstannyń erteńine qosqan úlesterińiz, - dedi QR Oqý-aǵartý mınıstri Juldyz Súleımenova.
Bıylǵy olımpıada qorytyndysy boıynsha 70 oqýshy altyn, 96 oqýshy kúmis, 158 oqýshy qola medal ıelendi. Intellektýaldyq saıys aıasynda barlyǵy 324 medal sarapqa salyndy. Sonymen qatar joǵary nátıje kórsetken komandalardyń jetistikteri de arnaıy atalyp ótti.
Bıyl «Absolıýtti jeńimpaz komanda» ataǵyn Rýmynııadan kelgen Býharest qalasyndaǵy Halyqaralyq kompıýterlik mektebiniń komandasy jeńip aldy. Birinshi oryn men «Úzdik olımpıadalyq komanda» ataǵy Reseıdiń V.F. Ovchınnıkov atyndaǵy «Ekinshi mektep» lıtseıine buıyrdy. Ekinshi oryndy Reseıdiń Kapıtsa atyndaǵy Fızteh-lıtseıi men «Vorobevy gory» komandalary ıelendi. Úshinshi oryndy Almaty qalasyndaǵy Respýblıkalyq fızıka-matematıka mektebiniń (Qazaqstan), Sofııa matematıka mektebiniń (Bolgarııa) jáne Reseıdiń №239 Prezıdenttik fızıka-matematıka lıtseıiniń komandalary oljalady.
Saıys qorytyndysy boıynsha qazaqstandyq oqýshylardyń qorjynynda 132 medal bar. Olardyń 28-i altyn, 35-i kúmis jáne 69-y qola medal. Budan bólek, elimizdiń joǵary oqý oryndarynan jeńimpazdarǵa rektorlyq granttar berildi.
Aıta keteıik, osyǵan deıin Almatyda HHІІ Halyqaralyq Jáýtikov olımpıadasy ótetinin habarlaǵan edik.