Qazaqstandyq oqýshylar álemdik chempıonatta alty marapat jeńip aldy

ASTANA. KAZINFORM — Álemdik chempıonatqa 110 elden 50 myńnan astam oqýshy qatysty, dep habarlaıdy Oqý-aǵartý mınıstrliginiń baspasóz qyzmeti.

Hıýstondaǵy FIRST Championship 2025 halyqaralyq ınjenerlik týrnırinde Qazaqstan quramasy úsh jas sanaty boıynsha rekordtyq nátıje kórsetti.

Qazaqstan namysyn jeti komanda qorǵady. Joǵary sanatta (12–18 jas) Almaty qalasyndaǵy Nazarbaev Zııatkerlik mektebiniń PID komandasy elimiz tarıhynda tuńǵysh ret jarystyń fınalyna ótip, eki marapat ıelendi — Motivate Award Winner jáne Division Finalist Award. Almatydaǵy Nazarbaev Zııatkerlik mektebiniń CRISTABOL komandasy tehnıkalyq jáne tehnıkalyq emes daǵdylardyń úzdik úılesimi úshin beriletin eń bedeldi marapat — INSPIRE Award-ty jeńip aldy.

Foto: Oqý-aǵartý mınıstrligi

Sana Team (Almatydaǵy Bilim-ınnovatsııa lıtseıi) jáne Jeltoqsun (Qaraǵandy qalasyndaǵy «Murager» mektebi) komandalary robottar oıyny boıynsha 258 komandanyń ishinen TOP-20 qataryna endi.

Orta sanatta (10–16 jas) — FIRST LEGO League Challenge týrnırinde Astana qalasyndaǵy «Skillset» mektebiniń SKILLSET komandasy Champions Award nomınatsııasy boıynsha fınalıst atandy.

Qaraǵandydaǵy «Murager» mektebiniń RASSLEXX komandasy Coopertition Award Winner marapatyn jeńip aldy.

Foto: Oqý-aǵartý mınıstrligi

Kishi sanatta (6–10 jas) — FIRST LEGO League Explore boıynsha Pavlodar qalasyndaǵy «Satýrn» mektebiniń ATLANTIS komandasy Team Model Award marapatyna ıe boldy.

— FIRST Global Challenge chempıonatynyń ereksheligi — bul jarysqa ártúrli jas deńgeıindegi birneshe komanda qatysady. Qazaqstan bul chempıonatqa nebári bes jyldan beri qatysyp keledi. Soǵan qaramastan, ondaǵan jyldyq tájirıbesi bar memlekettermen teń dárejede básekege túsýdemiz, — dedi USTEM Foundation qorynyń jetekshisi Asylbek Murzahmetov.

Osyǵan deıin qazaqstandyq 4 oqýshy halyqaralyq matematıkalyq olımpıadada el namysyn qorǵaıtyny habarlandy.