Qazaqstandyq oqýshylar AQSh-taǵy halyqaralyq robototehnıka týrnırlerinde top jardy
ASTANA. KAZINFORM – Qazaqstandyq oqýshylar AQSh-ta ótken eki iri halyqaralyq robototehnıka týrnırinde joǵary nátıjege qol jetkizip, birneshe bedeldi marapatqa ıe boldy.
FIRST Tech Challenge (FTC) baǵdarlamasy aıasynda uıymdastyrylǵan jarystarǵa álemniń úzdik komandalary qatysty. Qazaqstan namysyn Almaty, Aqtóbe jáne Shymkent qalalarynan barǵan oqýshylar qorǵady.
Kalıfornııa shtatynyń Long-Bıch qalasynda ótken Western Edge Premier Event 2026 týrnırine álemniń 11-den astam elinen 88 komanda qatysty. Jarys barysynda qatysýshylar robottardy jobalaý, baǵdarlamalaý jáne kúrdeli ınjenerlik mindetterdi sheshý boıynsha baq synady.
Qazaqstan atynan Almaty qalasynyń PHOBOS, Qazaq Style jáne UlyDala komandalary, sondaı-aq Aqtóbe qalasynyń GAMBIT komandasy óner kórsetti.
– Eń joǵary nátıjege PHOBOS komandasy qol jetkizdi. Oqýshylar týrnırdiń eń bedeldi marapattarynyń biri Inspire Award syılyǵyn ıelenip, Sea Division Winning Alliance Captain ataǵyna ıe boldy. Keıin chempıondyq alıansty bastap, Western Edge Premier Event 2026 týrnıriniń absolıýtti jeńimpazy atandy, – delingen habarlamada.
Sonymen qatar GAMBIT komandasy ınjenerlik sheshimderi men tehnıkalyq qujattamasynyń sapasy úshin Think Award 2nd Place marapatyn ıelendi. UlyDala komandasy pleı-off kezeńine joldama alsa, Qazaq Style baǵdarlamalaý jáne ınjenerlik ázirlemeler boıynsha joǵary nátıje kórsetti.
Qazaqstandyq oqýshylardyń taǵy bir jetistigi AQSh-tyń Kentýkkı shtatyndaǵy Leksıngton qalasynda ótken Run for the Robots Premier Event halyqaralyq týrnırinde tirkeldi. Álemniń úzdik FTC komandalary qatysqan dodada Shymkent qalasy Abaı aýdanynyń Zııatkerlik mektebiniń Atomic Heart komandasy erekshe kózge tústi.
– Jarys qorytyndysy boıynsha Atomic Heart komandasy Man o’ War dıvızıonynda Inspire Award marapatynyń ıegeri atandy. Bul FIRST Tech Challenge júıesindegi eń bedeldi marapat bolyp sanalady jáne robototehnıka, ınjenerlik qujattama, jobany tanystyrý, qoǵamdyq qyzmet jáne tálimgerlik baǵyttary boıynsha úzdik nátıje kórsetken komandaǵa beriledi, – dep atap ótti uıymdastyrýshylar.
Mamandardyń aıtýynsha, qazaqstandyq oqýshylardyń halyqaralyq jarystardaǵy jetistigi júıeli daıyndyqtyń, tálimgerler qoldaýynyń jáne jastardyń ınjenerlik ǵylymdarǵa qyzyǵýshylyǵynyń joǵary ekenin kórsetedi.
Aıta keteıik, buǵan deıin qazaqstandyq oqýshylar Qytaıdaǵy halyqaralyq robototehnıka týrnırinde eki marapatqa ıe boldy.
